Qoraqalpog‘iston Respublikasida umumiy qiymati 5,11 milliard dollar bo‘lgan uchta mayning va uchta data-markaz qurilmoqda. Bu haqda Qoraqalpog‘iston Jo‘qorg‘i Kengesi raisi Amanbay O‘rinbayev Prezident Shavkat Mirziyoyev ishtirokida yangi obyektlarni foydalanishga topshirish marosimida ma’lum qildi.

Qoraqalpog‘istonda mayning sohasi uchun maxsus zona tashkil etilishi avvalroq Prezident qarorida belgilangan edi. Data-markazlar uchun ajratilgan maxsus hududda investorlarga 2040 yilgacha soliq va bojxona to‘lovlarining barcha turlari bo‘yicha imtiyozlar berilishi belgilangan.

Amanbay O‘rinbayevning ta’kidlashicha, yaratilgan sharoitlar hududga jalb etilayotgan investorlar va investitsiyalarning nafaqat hajmi, balki sifatiga ham alohida e’tibor qaratish imkonini bermoqda.

«Ilgari investorlar kelsa, u katta bo‘lsin, kichik bo‘lsin, faqat investitsiya kiritsa, xursand bo‘lib yurardik. Hozir esa yaratib berilayotgan imkoniyatlar natijasida investorlarning ham, investitsiyalarning ham sifat darajasiga alohida e’tibor berish imkoniyati paydo bo‘lmoqda», — dedi Jo‘qorg‘i Kenges raisi.

Hududda «yashil» energetika sohasida ham yirik loyihalar amalga oshirilmoqda. ACWA Power kompaniyasi bilan hamkorlikda qiymati 3,3 milliard dollar bo‘lgan shamol elektr stansiyasi qurilmoqda.

Shuningdek, marosim doirasida qiymati 260 million dollar bo‘lgan «Nukus-2» shamol elektr stansiyasi foydalanishga topshirildi. 2025 yilda esa hududda qiymati 107 million dollar bo‘lgan «Nukus-1» loyihasi ishga tushirilgan edi.

Prezident Shavkat Mirziyoyev ishtirokida O‘zbekiston mustaqilligining 35 yilligi munosabati bilan hududlarda yangi obyektlarni ishga tushirish marosimi 25 avgust kuni bo‘lib o‘tdi. Unda umumiy qiymati 50 trillion so‘m bo‘lgan 72 ta yirik sanoat va servis loyihasi hamda 91 ta ijtimoiy soha obyekti foydalanishga topshirildi.