Avvalroq, O‘zbekiston inson huquqlari “Ezgulik” jamiyati raisi Abdurahmon Tashanov o‘zining Facebook sahifasida Toshkent viloyatidagi “Tovoqsoy” qamoqxonasida saqlanib kelinayotgan mahbus Alisher Yakubov qamoqxona xodimlarining muntazam qiynoqlari oqibatida vafot etganligi haqida post joylaganini xabar qilgandik.

Toshkent viloyati prokuraturasi Tashanovning ushbu ayibloviga nisbatan rasmiy munosabat bildirdi.

Qayd etilishicha, 7-sonli jazoni ijro etish koloniyasida jazo o‘tayotgan mahkumlar A.Ya. va T.D. 2022-yil 19-iyun kuni koloniya boshlig‘i tomonidan tasdiqlangan kun tartibiga rioya qilmasdan, o‘zlarining yashash sahniga kirish o‘rniga 2-yashash sahnidagi tanishlari oldiga yashirin ravishda o‘zboshimchalik bilan o‘tib, hech kimning ruxsatisiz, tartibot qoidalarini buzgan holda oldindan adovati bo‘lgan 5-turkumda jazo muddatini o‘tab kelayotgan mahkum A.Yu.ning qadr-qimmatini kamsituvchi so‘zlar bilan shaxsiyatiga tegib, qo‘pol muomalada bo‘lganligi holati koloniya xodimlari tomonidan aniqlanib, A.Ya. va T.D. lar intizomiy jazoga tortilgan.

Shundan so‘ng, bundan norozi bo‘lgan mahkumlar A.Ya. va T.D. binoning ikkinchi qavatidan koloniyaning taqiqlangan va yashash sahni tomonga qarab o‘zlarini uloqtirgan. Mahkumlar A.Ya. va T.O.ga birinchi tez tibbiy yordam ko‘rsatilgan.

“Hozirgi kunda ularning sog‘ligi qoniqarli holatda.

Toshkent maxsus prokuraturasi tomonidan tergovga qadar tekshiruv harakatlari o‘tkazildi va natijasiga ko‘ra, ushbu holatda jinoyat alomatlari aniqlanmaganligi sababli, jinoyat ishi qo‘zg‘atish rad etildi”,– deyiladi prokuratura munosabatida.

• Abdurahmon Tashanov
• Toshkent viloyati prokuraturasi
• rasmiy munosabat