Toshkent viloyati Zangiota tumanida 1,2 tonna sifatsiz go‘sht mahsulotlari savdosiga chek qo‘yildi. Bu haqda viloyati IIBB axborot xizmati ma’lum qildi.

Ma’lum qilinishicha, viloyat IIBB karantin tadbirlarini ta’minlash bo‘linmasi va Prokuratura departamenti xodimlari bilan hamkorlikda Zangiota tumanida o‘tkazilgan tadbir davomida tumanning Gulbog‘ mahallasida joylashgan 1993-yilda tug‘ilgan fuqaro B.T.ga (qassob) tegishli (noqonuniy) kushxona xolislar ishtirokida ko‘zdan kechirilgan.

Tekshirish davomida kushxonada sanitariya talablariga javob bermaydigan holatda saqlanayotgan, inson hayoti va sog‘lig‘i uchun xavfli bo‘lgan (tekshiruv xulosasi bilan) 1 tonna 271 kg go‘sht mahsulotlari daliliy ashyo sifatida hujjatlashtirilib olingan.

Mazkur holat yuzasidan fuqaro B.T. va u yerdagi boshqa fuqarolarga nisbatan Jinoyat kodeksining 186-moddasi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish) bilan jinoyat ishi qo‘zg‘atilib, tergov harakatlari olib borilmoqda.

• Go‘sht
• IIB
• Iste'molga yaroqsiz
• Prokuratura
• Qassob
• Toshkent viloyati