O‘zbekiston Respublikasining Birinchi xonimi, “Zamin” xalqaro jamoat fondi Vasiylik kengashi raisi Ziroat Mirziyoyeva onkologik kasalliklarga chalingan bolalarga tibbiy yordam ko‘rsatish tizimini rivojlantirishdagi yetakchiligi va har bir bolaning sog‘lom hayot kechirish huquqini global miqyosda ilgari surgani uchun JSSTning nufuzli xalqaro mukofoti — WHO Director-General’s Award 2026 bilan taqdirlandi.

🔷Bu qanday mukofot?

WHO Director-General’s Award — Jahon sog‘liqni saqlash tashkiloti Bosh direktorining global sog‘liqni saqlash sohasidagi nufuzli xalqaro mukofoti. U 2019-yilda JSST Bosh direktori Tedros Adxanom Gebreyesus tomonidan ta’sis etilgan. Laureatlarni shaxsan JSST Bosh direktori tanlaydi.

Ushbu mukofot global sog‘liqni saqlash sohasida alohida yetakchilik ko‘rsatib, aholi salomatligini muhofaza qilishda aniq natijalarga erishgan shaxslarga beriladi. Mukofot har yili cheklangan sondagi shaxslarga taqdim etiladi.

Masalan, 2024-yilda uch nafar, 2025-yilda ikki nafar laureat ushbu mukofotga loyiq ko‘rilgan. Ular orasida Nobel mukofoti sovrindorlari, amaldagi hukumat rahbarlari, xalqaro tashkilotlar rahbarlari va taniqli olimlar bor.

Xususan, Barbados Bosh vaziri Mia Mottli, fiziologiya va tibbiyot bo‘yicha Nobel mukofoti sovrindorlari Katalin Kariko va Dryu Vaysman, global sog‘liqni saqlash sohasidagi taniqli olim Piter Piot, Garvard professori Pol Farmer kabi dunyoga mashhur shaxslar ham ushbu mukofot bilan taqdirlangan.

🔵Mia Mottli — iqlim o‘zgarishi va uning inson salomatligiga ta’siri masalalaridagi yetakchiligi, shuningdek, mikroblarga qarshi preparatlarga chidamlilikka qarshi kurash bo‘yicha Global yetakchilar guruhi raisi sifatidagi faoliyati uchun 2024 yilda taqdirlangan.

🔵Katalin Kariko va Dryu Vaysman — COVID-19ga qarshi mRNK vaksinalarini yaratishga yo‘l ochgan ilmiy tadqiqotlari va ushbu texnologiyani rivojlantirishga qo‘shgan ulkan hissasi uchun 2024-yilda mukofotlangan. Ularning kashfiyotlari pandemiya davrida samarali mRNK vaksinalarini ishlab chiqishda hal qiluvchi ahamiyat kasb etgan. Kariko va Vaysman 2023-yilda fiziologiya va tibbiyot bo‘yicha Nobel mukofotiga ham sazovor bo‘lgan.

🔵Piter Piot — global sog‘liqni saqlash sohasidagi ko‘p yillik faoliyati va jamoat salomatligiga qo‘shgan ulkan hissasi uchun 2023-yilda taqdirlangan. U Ebola virusining ilk kashf etilishi va birinchi epidemiyani jilovlash ishlarida ishtirok etgan, keyinchalik OIV/OITSga qarshi global kurashda yetakchi rol o‘ynagan.

🔵Pol Farmer — dunyoning eng kam ta’minlangan aholi qatlamlariga sifatli tibbiy yordamni yetkazish, sog‘liqni saqlashda tenglikni ta’minlash, inson huquqlari va ijtimoiy tengsizlik masalalaridagi ko‘p yillik faoliyati uchun 2022 yilda vafotidan so‘ng taqdirlangan.

U Garvard tibbiyot maktabining Global salomatlik va ijtimoiy tibbiyot departamenti rahbari hamda kam ta’minlangan aholiga tibbiy yordam ko‘rsatuvchi Partners In Health xalqaro tashkiloti hammuassisi bo‘lgan.

🔵 Ziroat Mirziyoyevaning bolalar onkologiyasi bo‘yicha tibbiy yordam tizimini rivojlantirishdagi yetakchiligi, shuningdek, har bir bolaning sog‘lom hayot kechirish huquqini global miqyosda ilgari surish borasidagi faoliyati esa alohida e’tirof etildi.

“Muhtaram Birinchi xonim! Siz butun dunyoda bolalar, ayniqsa, onkologik kasalliklar bilan kurashayotgan bolalar manfaatlari yo‘lida chinakam kurashchi, har bir bolaning ta’lim olish va sog‘lom hayot kechirish huquqining himoyachisisiz”, — dedi JSST Bosh direktori Tedros Adanom Gebreisus.

JSSTning mazkur nufuzli mukofoti Birinchi xonim boshchiligida bolalar salomatligini himoya qilish borasida amalga oshirilayotgan ishlar va erishilgan natijalarning global miqyosdagi e’tirofi bo‘ldi.