O‘zbekistonda esa har yili 3 million tonna oziq-ovqat mahsulotlari chiqindiga aylanmoqda. Jumladan, birgina Toshkent shahrida har kuni 2 tonnaga, yiliga 730 tonnaga yaqin non mahsuloti chiqindiga tashlanadi.

Bu haqda joriy yil 21-aprel kuni Adliya vazirligi tomonidan tashkillashtirilgan “Oziq-ovqat mahsulotlari isrofgarchiligini kamaytirish va kam taʼminlangan aholini bepul isteʼmol mahsulotlari bilan taʼminlash” mavzusidagi davra suhbatida maʼlum qilindi.

Tahlillarga ko‘ra, O‘zbekistonda oziq-ovqat mahsulotlari isrofgarchiligiga xayriya qilingan mahsulotlar uchun soliq yukining yuqoriligi, fudshering platformalarining mavjud emasligi, oziq-ovqat banklari faoliyatining yo‘lga qo‘yilmaganligi kabi muammolar sabab bo‘lmoqda.

Tadbirda, shuningdek, oziq-ovqat mahsulotlari isrofgarchiligini kamaytirish borasida Germaniya, Fransiya, Italiya, Buyuk Britaniya, Chexiya, Yaponiya, Rossiya va Qozog‘iston kabi davlatlarda qo‘llanilayotgan choralar, xususan, xayriya faoliyati uchun soliq imtiyozlarini joriy etish, fudshering platformalari va oziq-ovqat banklari faoliyatini rivojlantirish, yaroqlilik muddatini belgilash tizimini takomillashtirish kabilarni O‘zbekistonda ham joriy etish masalasi muhokama qilinib, vazirlik va idoralarning masʼul xodimlari bu borada o‘z fikrlarini bildirib o‘tdi.

Tadbir yakunida oziq-ovqat mahsulotlari isrofgarchiligini oldini olish tizimini strategik takomillashtirish, mavjud resurslardan samarali foydalangan holda aholini bepul oziq-ovqat mahsulotlari bilan taʼminlash bo‘yicha qonunchilik hujjatlarini takomillashtirishga kelishib olindi.

BMT maʼlumotlariga ko‘ra, 2019-yilda dunyo bo‘yicha ishlab chiqarilgan jami oziq-ovqat mahsulotlarining 1,64 milliard tonnasi (jami oziq-ovqat mahsulotlarining 31 foizi) chiqindiga aylangan. Qayd etilishicha, bu o‘rinda yo‘qotilayotgan oziq-ovqat mahsulotlarining faqatgina 25 foizi butun dunyodagi ochlik muammosini to‘liq hal qilishi mumkin.

• Adliya
• Isrofgarchilik
• Non
• Toshkent