AQSh prezidenti Donald Tramp Daniya, Norvegiya, Shvetsiya, Fransiya, Germaniya, Buyuk Britaniya, Niderlandiya va Finlyandiyaga qarshi savdo bojlari joriy etilishini e’lon qildi.

Prezidentning so‘zlariga ko‘ra, 2026-yil 1-fevraldan ushbu davlatlardan Qo‘shma Shtatlarga keltiriladigan barcha mahsulotlarga 10 foizlik boj solinadi, 1-iyundan esa boj 25 foizgacha oshiriladi. Trampning ta’kidlashicha, cheklovlar AQSh tomonidan Grenlandiyani “to‘liq va yakuniy tarzda sotib olish” bo‘yicha kelishuvga erishilmaguncha amal qiladi.

Tramp o‘z bayonotida AQSh “ko‘p yillar davomida” Daniya va Yevropa Ittifoqi mamlakatlarini tariflar joriy etmasdan subsidiyalab kelganini, endi esa “qarzni qaytarish vaqti kelgani”, chunki “butun dunyodagi tinchlik xavf ostida turgani”ni ta’kidlagan. U, shuningdek, Rossiya va Xitoy Grenlandiya ustidan nazorat o‘rnatishga intilayotganini, Daniya esa orolni himoya qilishga qodir emasligini aytib o‘tgan.

Tramp sakkiz Yevropa davlatini “xavfli o‘yin” o‘ynashda ayblab, ularning Grenlandiyaga “noma’lum maqsadlarda” o‘z harbiylarini yuborishini bunga misol qilib ko‘rsatgan.

Tramp yana Grenlandiyani sotib olish zaruratini “Oltin gumbaz” raketaga qarshi mudofaa loyihasi bilan bog‘lab, orol ustidan nazorat bo‘lmasa, tizim geografik omillar sabab “maksimal samaradorlik bilan” ishlay olmasligini ta’kidlagan.

• AQSh
• Buyuk Britaniya
• Daniya
• Davlat boji
• Finlandiya
• Fransiya
• Germaniya
• Gollandiya
• Norvegiya
• Shvetsiya
• Tramp