Turkiyaning Royal Seginus mehmonxonasida Rossiyaning “Shinnik” jamoasi futbolchilari Ukrainaning “Minay” klubi oʻyinchilari bilan mushtlashib ketishdi.

Rossiya manbalarining maʼlum qilishicha, ukrainalik sportchilar rossiyalik futbolchilar bilan bir mehmonxonada oʻquv-mashgʻulot yigʻinida yashashini bilib, oʻzini tajovuzkor tutib, ataylab janjal qoʻzgʻatgan.

Dastlab, Baza kanali 13-fevral kuni kechqurun ukrainaliklar “Shinnik” klubi boshligʻidan Ukraina madhiyasini kuylashni talab qilgani, shundan soʻng, u koʻchaga chiqib “orani ochiq qilishni” taklif etgani haqida yozgan. Kanalning maʼlum qilishicha, mehmonxona vakillari oraga tushib, janjalning oldini olgan.

Keyinroq Baza voqea boshqacha boʻlganini, ukrainaliklar ruslardan nega Rossiya rejimiga qarshi norozilikka chiqmaganligini soʻraganidan keyin janjal yuz berganini yozgan. Shundan soʻng har ikkala tomon liftda mushtlashib ketgan. Vaziyatga politsiya aralashib, mojaroni toʻxtatgan.

Ukraina manbalari voqealar boshqacha rivoj olganini yozdi. “Zerkalo Nedeli” gazetasining yozishicha, rossiyalik futbolchi mast holda mehmonxona xodimlariga qoʻpol munosabatda boʻlgan, ukrainaliklar unga tanbeh berganidan keyin janjal boshlanib ketgan.

Rossiyaning Mash telegram kanali mushtlashuvda toʻrt nafar rossiyalik sportchi jarohatlangani haqida xabar berdi. Futbolchilar shifokor koʻrigidan oʻtgan. Ulardan birining labi kesilgan, boshqasining barmogʻi singan, yana birining qovurgʻasi singani gumon qilinmoqda. Ukrainalik sportchilarning jarohat olgani haqida maʼlumotlar yoʻq.

Huquq-tartibot idoralari xodimlari janjal takrorlanmasligi uchun mehmonxonada navbatchilik qilgan. “TASS” xabariga koʻra, futbolchilar politsiyaga ariza yozmaslikka qaror qilishgan. Yaqin kelajakda jamoalar turli mehmonxonalarga joylashtiriladi.

“RIA Novosti” xabariga koʻra, “Shinnik” klubi mehmonxona maʼmuriyatidan oʻz futbolchilarini ukrainalik futbolchilar bilan birga joylashtirmaslikni oldindan soʻragan, biroq 6-fevral kuni sodir boʻlgan zilzila tufayli Turkiya mehmonxonalarida joy yetarli emasligi aytilgan.

• Futbol
• Mushtlashuv
• Rossiya
• Ukraina