Moʻgʻul va turk arxeologlaridan iborat tadqiqotchilar guruhi Turkiyaning Onadoʻli hududidan XIII asrda qurilgan qadimiy qasr xarobalarini topishdi. Ushbu qasr Chingizxonning nabirasi Hulokuga tegishli boʻlib chiqdi. Saroy yaqinida aholi vakillari hayot kechirgan turarjoy xarobalari ham saqlanib qolgan.

Huloku xon Hulokuiylar davlatini boshqargan, u Kichik Osiyoning sharqiy qismini, shuningdek zamonaviy Eron, Ozarbayjon, Iroq va Afgʻoniston hududlarini ham bosib olgan. Tarixiy hujjatda uning 1261-1265 yillarda bugungi kunda Turkiyaning Van viloyati hududidagi yerlarda yozgi saroy qurgani qayd etiladi.

Olimlar koʻp yillik izlanishlar natijasida saroyning aynan qayerda joylashganini aniqlashga muvaffaq boʻlganlar. Saroy xarobalari atrofidan koʻplab tarixiy buyumlar ham topilgan.

Arxeologlarning fikriga koʻra, Hulokuxon saroyi Qoraqurum shahri (1220-1260 yillarda Moʻgʻullar imperiyasi poytaxti) namunasi asosida qurilgan. Olimlar hududdan buddaviylar ibodatxonasi qoldiqlari, shuningdek Hulokuiylar davriga tegishli sopol buyumlarni ham topishgan.

• Tarix
• artefakt
• qiziqarli