1-mart kunidan boshlab Rossiya Ukrainaga hujumni kuchaytirdi. Shu kuni erta tongda, rus atrelleriyasi Xarkov, Kiyev, Axtirka, Xerson va Gorlovka shaharlarini nishonga oldi.

Maʼlumotlarga koʻra, erta tongda rus harbiylari “Grad” raketa tizimi orqali Xarkovda davlat maʼmuriyati binosini oʻqqa tutgan. Ukraina favqulodda vaziyatlar davlat xizmati Xarkov viloyati maʼmuriyati binosining oʻqqa tutilishi oqibatida, olti kishi va bir bola jarohatlanganini taʼkidlamoqda. Bundan tashqari, oʻsha kuni Vasilov shahriga ham raketa hujumi uyushtirilgan. Shahar meri Natalya Balasinovichning bayonotiga koʻra, ikki nafar kishi halok boʻlgan, uch kishi jarohatlangan.

Rossiya tezroq Ukrainani taslim etish uchun hujum salohiyatini oshirgan boʻlishi mumkin. Sababi, Kiyevga shimoli-gʻarbdan Rossiya harbiy texnikasining koʻp kilometrlik kolonnasi yaqinlashayotgani haqida maʼlumotlar tarqaldi. Bundan koʻrinadiki, Rossiya katta kuch bilan Kiyev va boshqa shaharlarni shturm qilmoqchi.

Tush vaqtida, rus harbiylari Ukrainaning Sumi viloyati janubidagi Axtirka shahri markazidagi harbiy qismga artilleriya hujumi uyushtirdi. Maʼlumotlarga koʻra, buning oqibatida 70 nafar ukrainalik askar halok boʻlgan.

Kechki soat 16:00 chamasi, jurnalist Alyona Panina "Ukraina 24" telekanali efirida, Xerson shahri rus harbiylari tomonidan qurshab olinganini, ular chiqish joylarida nazorat punktlari oʻrnatganini taʼkidladi.

Kechga yaqin, Rossiya ukrainaliklarni axborot olishdan cheklash maqsadida Kiyev teleminorasiga ikki marotaba hujum qildi. Ukraina Favqulodda vaziyatlar davlat xizmatining maʼlumot berishicha, hujum oqibatida besh kishi halok boʻlgan, besh kishi yaralangan.

Tunda rus ogʻir artilleriyasi Xarkovni oʻqqa tutdi. Rossiya havo kuchlari Jitomirga hujum uyushtirib, oʻnlab uylarni vayronaga aylantirdi. Hujum oqibatida ikki kishi halok boʻlgani, uch kishi esa yaralangani aytilmoqda.

• Kiyev
• Rossiya
• Ukraina
• hujum
• vayronagarchilik