Oʻzbekistonga anomal sovuq ob-havo kirib kelishi munosabati bilan barcha boʻgʻindagi taʼlim muassasalari va maktabgacha taʼlim tashkilotlarida 2023-yilning 10-17 yanvar kunlari navbatdan tashqari taʼtil eʼlon qilindi.

Amaldagi Mehnat kodeksining 228-1-moddasiga muvofiq, byudjet hisobidan moliyaviy jihatdan taʼminlanadigan muassasalar va tashkilotlarda ishlayotgan uch yoshga toʻlmagan bolalari bor ayollarga ish vaqtining haftasiga oʻttiz besh soatdan oshmaydigan qisqartirilgan muddati belgilanishi lozim. Ish vaqtining qisqartirilgan muddati chogʻida ayollar mehnatiga haq toʻlash kamaytirilmaydi.

Shuningdek, kodeksning 229-moddasiga koʻra, oʻn toʻrt yoshga toʻlmagan bolasi (oʻn olti yoshga toʻlmagan nogironligi boʻlgan bolasi) bor ayolning, shu jumladan homiyligida shunday bolasi bor ayolning yoki oilaning betob aʼzosini parvarish qilish bilan band boʻlgan shaxsning iltimosiga koʻra, ish beruvchi tibbiy xulosaga muvofiq ularga toʻliqsiz ish kuni yoki toʻliqsiz ish haftasi belgilashga majburdir.

231-moddaga binoan esa oʻn toʻrt yoshga toʻlmagan bitta va undan ortiq bolani (oʻn olti yoshga toʻlmagan nogironligi boʻlgan bolani) tarbiyalayotgan yolgʻiz ota, yolgʻiz onaga (beva erkaklar, beva ayollar, nikohdan ajrashganlar, yolgʻiz onalarga) va muddatli harbiy xizmatni oʻtayotgan harbiy xizmatchilarning xotinlariga yillik taʼtillar, ularning xohishiga koʻra yoz vaqtida yoki ular uchun qulay boʻlgan boshqa vaqtda beriladi.

Bundan tashqari, farzandlari taʼtil boʻlgan vaqtda ota-onalar uchun ularning ish beruvchilarga:

– yillik mehnat taʼtilini ushbu vaqtda berishi;

– kelishuvga koʻra ish haqi saqlanmagan taʼtil berishi;

moslashuvchan ish vaqti rejimida yoki masofadan turib ishlash rejimida ishlashga ruxsat berish va rasmiylashtirish tavsiya etiladi.

• Mehnat_vazirligi
• O‘zbekiston
• Qonun