Xitoylik olimlar koronavirusning omikron shtammi nima uchun xavfli ekanligini tushuntirib berishdi.

Fudan universiteti qoshidagi Xuashan yuqumli kasalliklar shifoxonasi direktori Chjan Venxunning aytishicha, omikron bir necha marta mutatsiyaga duchor boʻlgani uchun ham undan xavfsirash oʻrinli. Bu yangi shtammning avvalgilariga nisbatan yashovchanlik qobiliyatini oshirgan va oʻzi paydo boʻlgan oʻchoqda avvalgi shtammlarning barchasi ustidan gʻalaba qozongan.

Omikronning ikkinchi xavfli jihati – uning haddan tashqari tez tarqalayotgani hisoblanadi. Epidemiolog Chjun Nanshanning aytishicha, koʻplab mamlakatlar omikronni oʻz hududlariga kiritmaslik uchun imkon qadar harakat qilayotganlari mana shundan.

Omikronning avvalgi shtammlaridan farqli uchinchi jihati – avval koronavirusni boshdan kechirgan va unga nisbatan immunitet hosil boʻlgan odam organizmga kira olishidir.

Shunga qaramasdan, ekspertlar omikronning qanchalar xavfli ekanligi haqida aniq bir xulosa qilishga hali juda erta ekani, buning uchun mavjud vaksinalarning yangi shtammga nisbatan qanchalar samarali ekanligini tekshirish kerak boʻlishini taʼkidlab oʻtishgan.

• koronavirus
• salomatlik