Xorazm viloyati Hazorasp tumani obodonlashtirish boʻlimi xodimlari hududda yashovchi bolalar egasiz itlar tufayli maktabga borolmayotgani boʻyicha aholi shikoyatini inobatga olgan holda 13 ta egasiz va daydi itni zaharli xoʻrak yordamida oʻldirdi. Bu haqda Hazorasp tumani hokimligi Matbuot xizmati maʼlum qilgan.

Ijtimoiy tarmoqlarda daydi itlar sababli tumanning “Zehnli” mahallasi bolalari maktabga bora olmayotgani haqida xabar tarqalgan edi. Unda itlarni otib oʻldirish emas, balki maxsus qoʻriqxonalar ochib, qarovsiz jonivorlarni oʻsha yerga joylashtirish va holat nazoratga olinishi soʻralgan.

Hazorasp tumani obodonlashtirish boʻlimining Qarovsiz qolgan daydi hayvonlarni ushlash va yoʻq qilish boʻlinmasi xodimlari mahalladagi daydi itlarning 13 tasini zaharli xoʻrak yordamida oʻldirgan.

Vazirlar Mahkamasining “Qarovsiz qolgan hayvonlarni tutish va saqlash bilan bogʻliq xizmatlar faoliyatini takomillashtirish chora-tadbirlari toʻgʻrisida”gi qaroriga koʻra, koʻchalarda va boshqa joylarda qarovsiz qolgan, shu jumladan, egasiz itlar ushlanib, vaqtincha saqlash uchun maxsus joylarga olib ketilishi kerak.

Taʼkidlash kerakki, odamlar va hayvonlarga jarohat yetkazgan yoxud nojoʻya harakat qilinmaganda, ularga hujum qilgan hayvonlarni keyinchalik karantin qilish uchun veterinariya va chorvachilikni rivojlantirish boʻlimlariga yetkazish belgilangan. Hatto quturish holati aniqlangan taqdirda ham karantin va tahdid zonasidagi quturishga moyil barcha hayvonlar profilaktik vaksinatsiya qilinishi belgilangan.

• Obodonlashtirish
• Xorazm