Xorazm viloyatining Gurlan tumanida aksiz markali tamaki va alkogol mahsulotlari sotayotgan “savdogar” aniqlandi. Bu haqda Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti xabar berdi.

Bosh prokuratura huzuridagi Departamentning Gurlan tuman boʻlimi tomonidan oʻtkazilgan tergovga qadar tekshiruvda, “Oʻ.S.” xususiy korxonasining Gurlan tumanidagi savdo doʻkonida aksiz markasiz 588 quti “Esse Change”, “Bisness Royals”, “Mond”, “Milano Tech”, “Milano Paris”, “Milano London” va “Milano Red” nomli tamaki mahsulotlari, shuningdek qalbaki aksiz markali 314 dona “Qarataw”, “Sobranie”, “Roberto Cavallia”va “Bionica” nomi ostidagi qoʻlbola usulda tayyorlangan alkogol mahsulotlari savdoga qoʻyilganligi aniqlanib, ashyoviy dalil sifatida olingan.

Shu kabi, Yangi bozor tumanida oʻtkazilgan tergovga qadar tekshiruvda, “D.A.” xususiy korxonaga qarashli savdo doʻkonida qalbaki aksiz markali 240 dona “Diplomat”, “Qaratav”, “Sheryurak” va “Dobriy vecher” nomi ostidagi qoʻlbola usulda tayyorlangan alkogol mahsulotlari savdoga qoʻyilganligi aniqlanib, qoʻlga olingan.

Ikkala holatlardagi mahsulotlar ham ashyoviy dalil sifatida olingan. Qonunbuzarlarga nisbatan Jinoyat kodeksining 176-moddasi (qalbaki pul, aksiz markasi yoki qimmatli qogʻozlar yasash, ularni oʻtkazish) bilan jinoyat ishlari qoʻzgʻatilib, tergov harakatlari oʻtkazilmoqda.

• Jinoyat
• Spirt
• Xorazm