31°
Kechasi 18°
Jizzax shahri va Sharof Rashidov tumani o‘rtasidagi 40 gektar bo‘sh yer maydonida Yangi Jizzax shahri quriladi. Bu prezidentning 30-yanvardagi “2026−2027-yillarda Jizzax viloyatini ijtimoiy-iqtisodiy rivojlantirishni jadallashtirish bo‘yicha qo‘shimcha chora-tadbirlar to‘g‘risida”gi qarorida ko‘zda tutilgan.
Hujjatga ko‘ra, Jizzax shahri va Sharof Rashidov tumani yagona aglomeratsiya sifatida rivojlantiriladi. Bu bo‘yicha bosh reja va shaharsozlik hujjatlari xorijiy ekspertlarni jalb qilgan holda ishlab chiqilishi va 1-aprelga qadar Vazirlar Mahkamasiga kiritilishi kerak. Bosh reja ishlab chiqish va infratuzilma bilan ta’minlash uchun 40 milliard so‘m ajratiladi.
Bosh rejaga Jizzax shahri va Sharof Rashidov tumani o‘rtasidagi 40 gektar bo‘sh yer maydoniga Yangi Jizzax shahrini joylashtirish hamda unda 1200 xonadonli 50 ta ko‘p qavatli uylarni qurish bo‘yicha aniq loyihalar kiritilishi belgilandi.
Hududda yagona ma’muriy markaz qurilib, tumandagi davlat muassasalari shu yerga ko‘chiriladi, bo‘shagan binolar esa xususiy sektorga beriladi. Jizzax shahri va Sharof Rashidov tumanini bog‘laydigan yagona jamoat transporti tizimi yo‘lga qo‘yiladi. Shuningdek, Jizzax shahri ichidagi tirbandliklarni kamaytirish maqsadida 10 km uzunlikda aylanma yo‘l quriladi. Hududda zarur muhandislik-kommunikatsiya infratuzilmasi yaratilib, ijtimoiy soha obyektlari quriladi.
Bundan tashqari, Sharof Rashidov tumanidagi 9 ta mahallada infratuzilma yaxshilanadi. Bu Jahon banki ishtirokidagi “Qishloq infratuzilmasini rivojlantirish” 2-bosqich loyihasi doirasida amalga oshirilib, 8 million dollar mablag‘ ajratiladi.
Shuningdek, hujjatga muvofiq, Jizzax viloyatida 2028-yilgacha yalpi hududiy mahsulot hajmini yillik o‘rtacha 8,5 foizga, sanoat ishlab chiqarish hajmini 7,8 foizga, bozor xizmatlari hajmini 13,2 foizga hamda qishloq xo‘jaligi mahsulotlari yetishtirish hajmini 4,6 foizga o‘stirish rejalashtirilmoqda.
2026-yilda ishsizlik darajasini 3 foizga va kambag‘allik darajasini 2,8 foizga tushirish, Jizzax shahri, Sharof Rashidov, Baxmal, G‘allaorol, Do‘stlik, Zomin va Zafarobod tumanlarini kambag‘allik va ishsizlikdan xoli hududga aylantirish ko‘zda tutilgan.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
