YouTube foydalanuvchilar uchun shaxsiy xabar almashish imkoniyatini bosqichma-bosqich qayta joriy etmoqda. Avval cheklangan auditoriyada sinovdan o‘tkazilgan yangi chat xizmati endilikda ko‘proq mamlakatlar va foydalanuvchilar uchun ochilmoqda.Kompaniya 2019-yilda platformadagi ichki xabar almashish funksiyasini yopgan edi.

Endi esa ushbu imkoniyat yangilangan ko‘rinishda qayta taqdim etilmoqda.Ma’lum qilinishicha, yangi chat xizmati orqali foydalanuvchilar musiqiy kliplar, o‘quv materiallari va “Shorts” videolarini ilovadan chiqmagan holda bevosita boshqalar bilan ulashishi mumkin bo‘ladi.Yangi tizim taklifnoma asosida ishlaydi.

Muloqotni boshlash uchun foydalanuvchi maxsus havolani yuboradi, uni qabul qilgan shaxs esa suhbatni davom ettirish yoki rad etish imkoniyatiga ega bo‘ladi.YouTube ushbu yangilanish orqali foydalanuvchilarning platforma ichida muloqot qilishi va kontent almashishini yanada qulaylashtirishni maqsad qilgan.