Bloger va teleboshlovchi Viktoriya Bonya O‘zbekistonga tashrif buyurib, paxta dalasidan turib mamlakat Prezidenti Shavkat Mirziyoyevga minnatdorlik bildirdi. Bu haqda u 25-iyun kuni o‘zining Instagram sahifasida e’lon qilingan videomurojaatida ma’lum qildi. «Men O‘zbekiston Prezidenti Shavkat Miromonovichga minnatdorlik bildirmoqchiman. Hozir men O‘zbekistonda, paxta dalalarida turibman. Bu yerga ma’lum bir missiya bilan keldim. Bu yerda bo‘lgan bir necha kun davomida nafaqat milliy madaniyat saqlab qolinayotganini, balki yerlarning salohiyati ham kengaytirilayotganini ko‘rdim. Tabiatni qadrlaydigan inson sifatida bu men uchun juda muhim.

Men ko‘plab mamlakatlarda bo‘lganman va ko‘ryapmanki, ayrim davlatlar tezkor ishlab chiqarish, arzon va sintetik mahsulotlarga o‘tmoqda. Bu esa, afsuski, ekologiyaga salbiy ta’sir ko‘rsatmoqda», — dedi Bonya. Shuningdek, bloger O‘zbekiston xalqiga ezgu tilaklarini ham bildirdi. «O‘zbekiston qanday rivojlanayotganini o‘z ko‘zlarim bilan ko‘rganimdan juda xursandman. Sizga, xalqingizga va yerlaringizga yana uzoq yillar davomida taraqqiyot va farovonlik tilayman.

Men bu yerda nafaqat mehmondo‘st va samimiy insonlarni, balki obod va yaxshi parvarishlangan hududlarni ham ko‘rdim. Bunday mehnatni qadrlamaslik mumkin emas. Xalqingizga rivojlanish va o‘sish uchun yaratilayotgan imkoniyatlar uchun sizga chin qalbimdan rahmat aytaman», — dedi Viktoriya Bonya.