“Teri kanasi” xastaligi haqida bilarmidingiz? Nomi anchayin vahimali tuyuladi. Ammo, uni uy hayvonlarida uchraydigan kana bilan adashtirmang. Biz bilgan kanadan farqli oʻlaroq, teri kanasi oʻta kichik hajmli boʻladi va qon soʻrish xususiyatiga ega emas. Biroq ancha-muncha noqulayliklar tugʻdirishi mumkin. Bu tibbiyot tilida “Demodekoz” deb nomlanadi.

Belgilari qanday?

Yuzingiz qichishib, teringiz qalinlashyaptimi, yalligʻlanishlardan charchadingizmi? Iyaklar, peshona, umurtqa atrofida shish va qizarishlar bormi? Koʻz atrofida achishish, qovoqda esa qizarish, qichishish va shish paydo boʻldimi? Kiprigingiz toʻkilib, koʻz atrofida oqish ajralmalar paydo boʻlishi ham teri kanasi alomatlaridan hisoblanadi. Agar yuqoridagi belgilar sizni anchadan buyon bezovta qilib kelayotgan boʻlsa, dermotolog- kosmetolog shifokorga murojaat qiling.

Yuz terisiga oid bu muammo asosan terining yogʻ almashinuvi buzilganida, stress va immunitet tushib ketganidan paydo boʻladi.

Ushbu mikroskopik kanalar terining yogʻ qatlamida yoki tuklar ildizida, teri hujayralari bilan oziqlanib kun kechiradi.

U koʻzga koʻrinmas darajada kichik boʻlgani tufayli (0,4-0,5 mm), bor-yoʻqligini kattalashtirib koʻrsatuvchi mikroskoplar yordamidagina aniqlasa boʻladi. Buning uchun esa kosmetikadan holi, toza teridan ozroq namuna olish kerak. Ayrim holatlarda qonning umumiy biokimyoviy tahlili ham buyurilishi mumkin.

Davosi bormi?

Odatda teri osti kanasini dermatolog shifokor aniqlab, turiga qarab davo choralarini tavsiya etadi. Bu xastalik asosan dori-darmon vositalari bilan davolansa-da, qoʻshimcha sifatida kosmetologik va fizioterapevtik muolajalar ham tavsiya etiladi.

Shuningdek, undan butunlay xalos boʻlish uchun yuz terisini kuniga 2-3 bor tozalash tavsiya etiladi. Doimiy ravishda piling muolajasiga murojaat qilish, uy sharoitida maxsus losyon va surtmalardan foydalanish, yuzni faqat bir martalik salfetkada artish va ushbu salfetkani tashlab yuborish, terini toza saqlash va gigiyenaga doimiy ravishda rioya qilish lozim.

Onalarimiz bejizga “Dugonangning upasidan foydalanma, lab boʻyogʻini surtma” deb taʼkidlashmaydi. Mikroorganizmlar aksariyat hollarda aynan shu vositalar orqali yuzga oʻtishi mumkin.

Kanalarning koʻpayishiga par yostiqlar katta hissa qoʻshadi. Shu sababli bemorlarga sinteponli yostiqlarda yotish tavsiya etiladi. Koʻchada, jamoat joylarida yurganingizda qoʻlingiz bilan hamma joyni ushlab yurasiz, pul sanaysiz, eshik tutqichlarini ushlaysiz va oxirida yuzingizga tegasiz. Koʻpincha mana shu holatda xam demodeksni yuqtirib olishingiz mumkin.

Oʻzingizni ehtiyot qiling!

• Foydali
• salomatlik