Ижтимоий тармоқларда 18 ёшли талаба қиз ўзини метро тагига ташлагани ҳақида хабарлар тарқалди.

Маълумотларга кўра, 12 октябрь “Алишер Навоий” метро бекатида хизмат қилаётган ИИО ходими О.Илҳомов қиз электр поезди стансияга яқинлашаётган пайтда рельсга сакраб тушганини пайқаб, унга ёрдамга шошилган ва рельсга сакраб тушиб уни кўтариб тортиб олишга ҳаракат қилган. Машинист ходимни пайқаб, дарҳол электр поездини тўхтатган. Бу вақтда иккинчи назоратчи ходим А.Асқаров ёрдамга етиб келган ва у ҳам рельсга тушиб, қизни биргаликда платформага кўтариб олишган.

Шундан сўнг поездлар ҳаракати тикланган. Қиз билан суҳбат ўтказилганда, у 2005 йилда Фарғона вилоятида туғилгани, ҳозирда Низомий номидаги Тошкент давлат педагогика университетининг 2-курс талабаси экани маълум бўлган.

Қизга тиббий ёрдам кўрсатилиб, унинг қариндошларига воқеа ҳақида хабар берилган.

Ушбу ҳолат юзасидан қиз ҳозирда таълим олаётган Тошкент давлат педагогика университети расмий маълумот берди.

Мазкур ҳолат рўй берганидан сўнг университет раҳбарияти талаба қиз билан учрашган ва суҳбат давомида қиз ҳолсизлиги туфайли боши айланиб, ўзи билмаган ҳолда “Алишер Навоий” метро бекатида йиқилиб тушгани маълум бўлган.

“Поезд рельсига сакради” деган хабарлар асоссиз. Ҳозирги кунда талабанинг аҳволи яхши, соғлигида ҳеч қандай муаммо йўқ, ўз уйида ота-онаси бағрида. Раҳбарият томонидан барча зарур бўлган шарт-шароитлар яратиб берилди, - дейилади хабарда.

• Фарғона
• Метро
• Педагогика
• Поезд