Самарқанд шаҳрида тўрт кунлик ўғлини 85 минг долларга сотмоқчи бўлган аёлга суд ҳукми ўқилди. Жиноят ишлари бўйича Самарқанд шаҳар суди уни одам савдосида айбдор деб топиб, 7 йилга озодликдан маҳрум қилиш жазосини тайинлади. Бироқ жазо шартли қўлланилиб, унга уч йил синов муддати белгиланди.
Суд ҳужжатларига кўра, 1999 йилда туғилган аёл Самарқанддаги олий таълим муассасаларидан бирида таҳсил олган. Турмуш ўртоғи билан келишмовчиликлар сабаб ота-онасининг уйида яшаб келган. У 2026 йил июль ойида Телеграмдаги “Суррогат она” гуруҳига қўшилиб, фарзандини сотиб олмоқчи бўлган шахслар билан боғланган. Дастлаб чақалоқ учун 70 мингдан 90 минг долларгача пул таклиф қилинган.
Июль ойи охирида аёл жарроҳлик амалиёти орқали ўғил фарзандли бўлган. Дастлаб у боласини бериш фикридан қайтганини билдирган. Бироқ Телеграм орқали боғланган шахслар уни қўрқитганидан сўнг туғуруқхона манзилини юборган.
Кейинчалик туғуруқхона олдига икки эркак ва бир аёл келган. Судланувчи шифокорларга чақалоқни Тошкентга олиб кетишини айтиб, тегишли тилхат ёзган ва болани ташқарига олиб чиққан. У ерда чақалоқ учун 85 минг доллар таклиф қилинган.
Аёл пулни олаётган вақтда Самарқанд шаҳар ички ишлар органлари ходимлари томонидан ўтказилган тезкор тадбир давомида қўлга олинган.
Судда аёл айбига тўлиқ иқрор бўлиб, қилмишидан пушаймонлигини билдирган. Унинг қарамоғида уч нафар фарзанди борлиги, соғлиғи ёмонлашгани ва оилавий ҳолати инобатга олиниб, Жиноят кодексининг 57-моддаси қўлланган. Шунингдек, кодекснинг 72-моддасига асосан тайинланган 7 йиллик озодликдан маҳрум қилиш жазоси шартли деб белгиланган ва уч йил синов муддати тайинланган.
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!
Ўзбекистон ва жаҳонда рўй бераётган энг сўнгги воқеа-ҳодисалар, спорт, шоу-бизнес, маданият, информацион технологиялар ва илм-фан янгиликларидан доимо хабардор бўлинг!