“Юксалиш” умуммиллий ҳаракати ҳар йили май ойи аввалида Ўзбекистонда кўтариладиган мавзу – “9 май – Хотира ва қадрлаш куни” санасини қай тартибда нишонлаш масаласида ўз фикрлари билан бўлишди.

Ҳаракатнинг таъкидича, ҳар йили май ойи бошларида турли расмий ва норасмий доираларда ушбу кунни сиёсийлаштиришга бўлган ҳаракатлар кузатилади ва бунда “Ўзбекистон учун 9 май қандай чуқур қадриятларни акс эттиришини халқаро ҳамжамият тушуниши керак”.

“Юксалиш” мазкур сананинг аҳамияти ҳақида сўз юритар экан, Иккинчи жаҳон урушида иштирок этган ва ҳалок бўлган ўзбекистонликлар, Ўзбекистонга кўчирилган болалар ва фашизм устида эришилган ғалаба хусусида тўхталади.

“Биринчидан, ушбу кунда инсоният тарихидаги энг даҳшатли ва қонли Иккинчи жаҳон урушида ҳалок бўлган ярим миллиондан зиёд ўзбекистонликларнинг руҳи хотирланади.

Иккинчидан, 9 май — урушда қатнашган 1,5 миллиондан ортиқ ватандошимизнинг жасоратини, фронт ҳудудларидан Ўзбекистонга кўчирилган бир миллионга яқин оила ва болаларни қабул қилган  халқимизнинг бағрикенглигини англаш ва қадрлаш куни.

Учинчидан, бу кунда Жаҳон урушидан олдин ва кейинги тарихимизда Ватанимиз тинчлиги ва равнақи учун жонини фидо қилган барча аждодларимиз хотирланади. Ҳаёт бўлганларига эса ҳурмат ва эҳтиром кўрсатилади, қўллаб-қувватлаш чоралари кўрилади”, – дейилади Ҳаракат муносабатида.

Ҳаракат, шунингдек, мазкур санани ортиқча сиёсийлаштирмаслик,  андозалаштиришга берилмаслик, вазмин ва жамиятимиз қадриятларига таянган ҳолда нишонлашга чақирмоқда.

• 9 май
• Муносабат
• Yuksalish