Ушбу ғалаба испаниялик теннисчига дунёнинг биринчи ракеткаси бўлиш баробарида 5 миллион АҚШ доллари миқдоридаги пул мукофотини ҳам тақдим этди.

Нью-Йорк шаҳрида якунига етган теннис бўйича “Катта Дубулға” туркумига кирувчи АҚШ Очиқ чемпионати финалга қадар дунёнинг иккинчи ракеткаси бўлиб келган Карлос Алкараснинг тарихий ғалабаси билан тугади. 

Испаниялик теннисчи ҳал қилувчи баҳсда амалдаги чемпион, узоқ вақт дунёнинг биринчи ракеткаси мақомида бўлиб келган италиялик Янник Синнерни 6/2, 3/6, 6/1, 6/4 ҳисобларида мағлубиятга учратди. Теннисчиларнинг ўзаро учрашувларида Карлос катта фарқ билан олдинда бормоқда – 11:5.  

Финал икки соат-у 44 дақиқа давом этди.

Алкарас иккинчи бор US Open турнири чемпионига айланди. У 2022 йилда ҳам бош совринни боши узра баланд кўтарган эди. Энди у “Катта Дубулға” турнирларининг 6 карра ғолиби. US Open мусобақасидаги икки ҳафталик меҳнат Алкарасга мукофот пулидан ташқари 2000 рейтинг очкосини ҳам келтирди. Шу тариқа, испаниялик ATP рейтингида биринчи ўринга кўтарилиб олди. Синнер эса 2,5 миллион АҚШ доллари ишлаб, рейтингда эса 2-ўринга пастлади.

• АҚШ
• Катта дубулға
• Теннис