Ўзбекистонда “Док-1 Макс” ва “Амбронол” дори воситаларидан жабрланган болаларнинг оилаларига компенсатсия тўлиқ тўлаб берилди. Товон пулининг 2026-йил 20–24-октябрь кунлари тўланган қолган қисми давлат ҳисобидан қопланган. Бу ҳақдаги маълумотни жабрланган болаларнинг ота-оналари ва Мажбурий ижро бюроси (МИБ) тасдиқлаган.

Суд ҳукмларига кўра, компенсатсия Фарматсевтика тармоғини ривожлантириш агентлигининг собиқ раҳбари ва унинг ўринбосарлари, шунингдек, дори ишлаб чиқарувчининг Ўзбекистондаги расмий дистрибютори — Қурамах МЧЖ вакилларидан ундирилиши белгиланган эди. Бироқ “Газета” нашри ота-оналар тақдим этган банк ҳужжатларини ўрганиб, уч йил давомида судланган шахслардан белгиланган товон пулининг атиги 20 фоизи ундирилганини аниқлаган.

Компенсатсиянинг қолган 80 фоизи октабр ойида давлат маблағлари ҳисобидан тўлиқ қопланган. МИБ матбуот котиби Фаррух Тошпўлатов бу маълумотни тасдиқлаб, масала юзасидан Соғлиқни сақлаш вазирлиги билан ҳамкорликда жамоатчиликка қўшимча ахборот берилиши ва матбуот анжумани ташкил этилиши мумкинлигини билдирган.

Аввалроқ МИБ “Док-1 Макс” иши бўйича 85 нафар фуқаро фойдасига жами 78 миллиард сўм зарар ундириш юзасидан ижро ишлари олиб борилаётганини маълум қилган. 2026-йил 7-октябрь ҳолатига кўра, шундан 16,7 миллиард сўми тўланган, қолган 61,3 миллиард сўмни ундириш ишлари давом этаётган эди.

“Док-1 Макс” билан боғлиқ фожиа оқибатида Ўзбекистонда 68 нафар бола вафот этган, 16 нафари ногирон бўлиб қолган. Суд қарорига кўра, вафот этган болаларнинг қонуний вакилларига 1 миллиард сўмдан, оғир тан жароҳати туфайли ногирон бўлиб қолган болаларнинг вакилларига 500 миллион сўмдан, енгил тан жароҳати олган жабрланувчиларга эса 200 миллион сўмдан товон пули белгиланган.

Компенсатсия жабрланувчиларга тўлиқ етказилган бўлса-да, давлат ҳисобидан қопланган маблағлар кейинчалик судланган шахслардан қайта ундирилиши ёки ундирилмаслиги ҳозирча маълум эмас.