“Ўзбекфилм” киностудиясининг 10 гектарлик ҳудудида кино хизматларини бирлаштирувчи “Ўзбекфилм кино шаҳарчаси” ташкил этилади. Бу ҳақда Президент матбуот котиби Шерзод Асадов маълум қилди.

Янги мажмуада замонавий технологиялар билан жиҳозланган дубляж ва овозлаштириш маркази қурилади. Кино шаҳарчаси филм яратиш жараёнлари учун замонавий инфратузилмани шакллантиришга хизмат қилади.

Белгиланган топшириққа кўра, икки ой ичида малакали лойиҳа ташкилоти жалб этилиб, кино шаҳарчасининг бош режаси ва лойиҳа-смета ҳужжатлари ишлаб чиқилади. Қурилиш ишлари 2027-йил март ойидан бошланиши режалаштирилган.

Шунингдек, кино тизимидаги фойдаланилмаётган давлат активларини очиқ савдога чиқариш топширилди.