АҚШ Давлат департаменти амалдаги визаларга эга бўлган барча 55 миллион хорижликни депортацияга олиб келиши мумкин бўлган миграция тартибини бузиш ҳолатлари бўйича текшириш бошланганини эълон қилди.

“АҚШ визасига эга бўлган барча шахслар “доимий назорат” остида бўлиб, уларда виза олиш ҳуқуқининг йўқлигини кўрсатадиган ҳар қандай белгилар аниқланиши мақсадида текширувлар олиб борилади” — дея маълум қилган АҚШ Давлат департаменти “Тhe Associated Press” агентлигига берган изоҳида.

Қайд этилишича, мамлакатда бўлиш муддатини ошириб юбориш, жиноий фаолият ёки террорчилик фаолиятида иштирок этиш каби ҳуқуқбузарликлар аниқланган тақдирда, виза бекор қилинади ва унинг эгаси мамлакатдан чиқариб юборилиши мумкин.

Бундан ташқари, давлат котиби Марко Рубио тижорат юк машиналари ҳайдовчиларига ишчи визалар бериш тўхтатилишини маълум қилди. Унинг сўзларига кўра, хорижий ҳайдовчилар сонининг кўпайиши йўллардаги хавфсизлик ва америкалик ҳайдовчиларнинг тирикчилигига таҳдид солмоқда. Транспорт вазирлиги эндиликда ҳайдовчилар учун инглиз тилини билиш талабларини кучайтиради.

“АP” хабарига кўра, текширувлар виза эгаларининг ижтимоий тармоқлари таҳлили ва уларнинг мамлакатлари ҳуқуқ-тартибот ва иммиграция идоралари маълумотларини қамраб олади, шунингдек, улар мамлакатда бўлган даврда АҚШ қонунларининг ҳар қандай бузилиши ҳисобга олинади.

“Миллий хавфсизликни ҳимоя қилиш бўйича мажбуриятлар доирасида февраль ойидан бери Давлат департаменти икки баравардан кўпроқ, шу жумладан ўтган йилнинг шу даврига нисбатан деярли тўрт баравар кўп талабалар визаларини бекор қилди” - дейилади хабарда.

Аксарият хорижий фуқароларга, айниқса, узоқ муддатли ўқиш ёки меҳнат фаолиятини режалаштираётганларга АҚШга кириш учун виза талаб қилинади. Визасиз кириш дастури доирасида эса асосан Европа ва Осиёнинг 40 та давлатлари фуқаролари истисно қилинган бўлиб, уларга визасиз АҚШда уч ойгача қолиш имконияти берилади.

Эслатиб ўтамиз, АҚШда яқинда 6 мингдан ортиқ талабалар визаси муддатидан ошиш ва қонун бузилишлари сабабли бекор қилинди. Маъмурият бир қатор бошқа ўнлаб мамлакатлар фуқаролари учун кириш чекловларини сезиларли даражада кенгайтириш имкониятларини кўриб чиқмоқда.

АҚШ ички хавфсизлик вазирлигининг маълумотларига кўра, ўтган йили мамлакатда 12,8 миллионга яқин грин-карт эгаси ва 3,6 миллион миқдорида муддатли визаларга эга шахслар рўйхатга олинган. Жорий йилда эса Ўзбекистон грин-карт ғолиблари сони бўйича биринчи ўринни эгаллаб, 5564 нафарни ташкил этди. Шу билан бирга, мамлакатимиздан АҚШда таълим олаётган талабалар сони 1219 нафарга етди.

• АҚШ
• Departament
• Виза
• Xavfsizlik