АҚШ Марказий қўмондонлиги Президент Дональд Трамп топшириғига биноан Эрондаги бир нечта нишонларга қарши «ўзини ҳимоя қилиш мақсадида қўшимча зарбалар» берила бошланганини маълум қилди.
Ҳарбийлар баёнотига кўра, ҳужумлар Эроннинг «асоссиз ва давом этаётган тажовузи»га жавоб сифатида амалга оширилмоқда. АҚШ Мудофаа вазири Пит Ҳегсет ҳам Марказий қўмондонлик фаол ҳарбий ҳаракатларни бошлашини тасдиқлаб, Президент Трампнинг «Эронга кучли зарба бериш» бўйича кўрсатмаси бажарилаётганини айтди.

Шу билан бирга, Ҳегсет Эрон ҳали ҳам музокаралар йўлини танлаши ёки можарони янада кескинлаштириши мумкинлигини таъкидлади

10 июнь куни Эроннинг «Mehr» агентлиги мамлакат Ислом инқилоби қўриқчилари корпуси Жам шаҳри осмонида АҚШнинг MQ-9 Reaper учувчисиз учиш аппаратини уриб туширганини хабар қилди.

Аввалроқ Дональд Трамп музокараларда сезиларли силжиш кузатилмаётгани ҳамда АҚШнинг Apache жанговар вертолёти йўқ қилингани ортидан Эронга қарши бомбардимонларни қайта бошлаш ниятида эканини билдирган эди. Мазкур вертолёт 8 июнь куни Уммон соҳиллари яқинида ҳалокатга учраган, унинг икки учувчиси қутқариб қолинган.

Эрон Президенти Масъуд Пезешкиён эса мамлакати «қатъий туришини» маълум қилиб, АҚШ таҳдидларини қоралади.

«Axios» нашри манбаларига кўра, Дональд Трамп миллий хавфсизлик бўйича расмийлар билан йиғилиш ўтказган. Муҳокама қилинаётган сценарийлардан бири Эронга қарши қисқа муддатли, аммо кенг кўламли ҳарбий операцияни бошлаш бўлиб, унинг асосий мақсади Теҳронни музокаралардаги позициясини ўзгартиришга мажбур қилишдан иборат.