Россиянинг энг йирик нефть компанияларидан бири “Лукойл” хорижий активларини сотишини эълон қилди. Бунга компания ва унинг шўба корхоналарига нисбатан “баъзи давлатлар томонидан чеклов чоралари жорий этилиши” сабаб бўлди. “Потенциал харидорларнинг таклифларини кўриб чиқиш бошланди”, — дейилади “Лукойл”нинг инглиз тилидаги сайтида.

АҚШ Молия вазирлигининг Хорижий активларни назорат қилиш бошқармаси 22 октябрь куни Россиянинг “Лукойл” ва “Роснефт” компанияларига қарши санкциялар киритди. Чекловлар урушни якунлаш учун “Россиянинг тинчлик жараёнига жиддий қизиқиши йўқлиги” сабаб жорий этилди.

“Президент Путин бу бемаъни урушни тўхтатишдан бош тортганини ҳисобга олиб, Молия вазирлиги Кремль ҳарбий машинасини молиялаштираётган Россиянинг иккита энг йирик нефть компаниясига қарши санкциялар жорий этмоқда”, — дейилади АҚШ молия вазири Скотт Бессент баёнотида. Бундан ташқари, АҚШ Молия вазирлиги “президент Трампнинг Россия урушини тўхтатиш бўйича саъй-ҳаракатларини қўллаб-қувватлаш” учун “қўшимча чоралар кўришга” ҳам тайёр. Идора, шунингдек, “иттифоқчиларни” уларга қўшилишга ва “ушбу санкцияларга амал қилишга” чақирди.

Россиянинг икки йирик нефть компанияси — “Роснефт” ва “Лукойл” акциялари АҚШ санкцияларидан кейин қулади. Икки кун ичида уларнинг жами капитализацияси 424 миллиард рублга (5,2 миллиард доллар) тушиб кетган.

Санкциялар “Лукойл” ва “Роснефт” компанияларининг Россия ҳудудидаги шўба корхоналарига ҳам татбиқ этилган. Умуман олганда, рўйхатда 34 та шўба корхона бор: уларнинг 28 таси “Роснефт”га, олтитаси эса “Лукойл”га тегишли.

• АҚШ
• Россия
• Санкция
• нефть