Тошкент шаҳар бюджетининг қўшимча манбаларини харажатларга йўналтириш мақсадида 87 миллиард сўм ажратилди. Бу бўйича Халқ депутатлари Тошкент шаҳар кенгаши қарори қабул қилинди.

Қарорга кўра, маҳаллий бюджетдан жами 87 миллиард сўм ажратилади. Маблағнинг 65 миллиард сўми иш ҳақи миқдори оширилгани, шунингдек, электр энергияси тарифлари кўтарилгани сабабли мазкур харажатларга йўналтирилади.

Шунингдек, 22 миллиард сўм қуйидаги йўналишларга йўналтирилади:

– “Кўча санъати ва мусиқаси” streat.uz платформасида фаол иштирок этган ижодкорларни моддий рағбатлантириш учун — 24,7 миллион сўм;

– 2025–2026-ўқув йили учун ижтимоий эҳтиёжманд оилалар вакиллари, етим ёки ота-онасининг қарамоғидан маҳрум бўлган талаба аёлларни моддий қўллаб-қувватлаш мақсадида 150 нафар талабанинг контракт тўлови учун — 1,4 миллиард сўм;

– Тошкент шаҳар камбағалликни қисқартириш ва бандлик бошқармасининг йил якунигача электр энергияси сарфи учун — 130 миллион сўм;

– Шахмат федерацияси шаҳар бўлимига мебель, техника ва жиҳозлар хариди учун — 400 миллион сўм;

– Велоспорт федерацияси шаҳар бўлимига Damas автомобили хариди учун — 100 миллион сўм;

– Қон орқали юқадиган касалликларнинг олдини олиш мақсадида Cell Saver E “+” қон аутотрансфузия ускунасини харид қилиш учун — 750 миллион сўм;

– Шайхонтоҳур туманидаги 169-мактаб учун Isuzu автобуси хариди — 770 миллион сўм;

– Мактабгача ёшдаги болаларни қамраб олишни кенгайтириш, фаолияти тўхтаб қолган гуруҳларни қайта тиклаш, давлат боғчаларини таъмирлаш ва жиҳозлаш учун — 10,5 миллиард сўм;

– “Тошкент тажрибаси” лойиҳаси доирасида мактабларда қўшимча фанлар бўйича синфларни таъмирлаш ва дарс ўтувчи ўқитувчиларга устама тўлаш учун — 4 миллиард сўм;

– Болалар учун мўлжалланган контентлар яратишни қўллаб-қувватлаш учун — 1 миллиард сўм;

– Педагоглар малакасини ошириш, ҳар бир тумандан 5 нафардан жами 60 нафар математика ва тиббий фан ўқитувчиси ҳамда бошқармадан 3 нафар ходимни хорижда ўқитиш харажатлари учун — 1,7 миллиард сўм;

– Тошкент шаҳар ветеринария ва чорвачиликни ривожлантириш бошқармасига коммунал тўловлар учун — 373 миллион сўм;

– Тошкент шаҳар ободонлаштириш бош бошқармаси томонидан Олмазор туманидаги Форобий кўчасида 7 650 кв.м йўлни асфальт билан таъмирлаш учун — 876 миллион сўм.

Қарорда маблағларнинг мақсадли сарфланишини таъминлаш ва назорат қилиш бўйича масъул ташкилотларга аниқ топшириқлар юклатилган.

Шу билан бирга, 518,1 млрд сўм ватан ҳимоячилари кунига бағишлаб ўтказилган асосий байрам концерт дастурига тайёргарлик кўриш ва уни ўтказиш билан боғлиқ харажатларга ажратилган.

• Бюджет
• Тошкент