АҚШ Марказий қўмондонлиги (CENTCOM) ва Сурия Ички ишлар вазирлиги 24–27 ноябрь кунлари ИШИДнинг махфий омборларига биргаликда зарбалар берди. 

Маълум бўлишича, ҳужумлар Суриянинг Риф-Дамашқ провинциясидаги террорчилик ташкилотига тегишли объектларга қаратилган. Жами 15 та жойга ҳаво ва қуруқликдан зарбалар йўлланган. Натижада 130 дан ортиқ миномётлар, ракеталар, бир нечта милтиқлар, пулемётлар, танкка қарши миналар ва қўлбола портловчи қурилмалар учун мўлжалланган материаллар йўқ қилинган. АҚШ ва Сурия хавфсизлик кучлари бир неча партия гиёҳванд моддаларни ҳам топиб, йўқ қилган.

“Ушбу муваффақиятли операция ИШИДга қарши курашдаги ютуқлар узоқ муддатли бўлишини ва улар террорчилик ҳужумларини қайта бошлай олмаслигини ёки уларни АҚШ ҳудудига ва бутун дунёга ёя олмаслигини кафолатлайди”, – деди CENTCOM қўмондони адмирал Бред Купер.

10 ноябрь куни АҚШ президенти Доналд Трамп Вашингтондаги қароргоҳида Сурия президенти Аҳмад аш-Шараа билан учрашган эди. Шу куни Суриянинг ахборот вазири Ҳамза Мустафо мамлакат ИШИДга қарши кураш бўйича АҚШ бошчилигидаги халқаро коалицияга қўшилганини айтди.

Трамп учрашувдан сўнг Аш-Шараани “жуда кучли етакчи” деб атаб, улар яхши муносабатларни йўлга қўйишга муваффақ бўлганини билдирган.

“Биз Сурия муваффақиятга эришиши учун қўлимиздан келганини қиламиз, чунки у Яқин Шарқнинг бир қисми”, – деган эди АҚШ президенти.

Аш-Шараа эса 10 ноябрь куни Fox News эфирида унинг “Ал-Қоида” террорчилик ташкилоти билан ҳамкорлиги “ўтмишдаги иш” экани ва Доналд Трамп билан учрашувда бу мавзу муҳокама қилинмаганини билдирган.

• АҚШ
• Ҳамкорлик
• Havo hujumi
• ИШИД
• Suriya