Аввалроқ, АҚШ Зангазур йўлагини 100 йилга ижарага олиш ниятида экани ҳақида хабар берган эдик. Бироқ Арманистон суверен ҳудудининг учинчи томонга топширилиши муҳокама қилинмаётгани маълум бўлди. Бу ҳақда мамлакат Бош вазири матбуот котиби Назели Багдасарян баёнот берди.

Ушбу изоҳ АҚШнинг Туркиядаги элчиси Том Барракнинг баёнотига жавобан берилди. Барракнинг сўзларига кўра, АҚШ Арманистон ва Озарбайжон ўртасидаги музокараларнинг олдинга силжишига ёрдам бериш мақсадида Зангазур йўлагини 100 йилга ижарага олишга тайёр. Бироқ Багдасарянга кўра, мазкур масала муҳокама қилинмаяпти.

“Арманистон суверен ҳудудининг бошқарувини учинчи томонга топширишни муҳокама қилмаган ва бундай масалани муҳокама қилмаяпти. Арманистон Республикасининг ҳеч бир қисми унинг ҳудудий яхлитлиги, суверенитети ёки юрисдикциясидан ташқарида бўлиши мумкин эмас”, – дейди у.

Багдасаряннинг айтишича, Арманистон қонунчилигига кўра, ҳудудлар фақат қишлоқ хўжалиги мақсадлари учун ижарага берилиши мумкин.

“Шу боис, АҚШ элчиси томонидан тилга олинган вариант қонунан мумкин эмас”, – дея қўшимча қилган у.

Маълумот учун, Зангазур коридори – бу транспорт лойиҳаси бўлиб, у орқали Озарбайжоннинг асосий ҳудуди билан унинг эксклави – Нахичевон Автоном Республикаси ўртасида Сюник вилояти орқали алоқа ўрнатилиши режалаштирилган. Йўлнинг узунлиги тахминан 40 километрни ташкил этади.

Арманистон “Зангазур коридори” атамасини рад этади, чунки бу ҳудудий яхлитлигига таҳдид сифатида кўрилмоқда. Айни вақтда Озарбайжон коридор устидан халқаро назорат бўлишини талаб қилмоқда, чунки у Арманистон томонидан эркин транзитга кафолат берилишига шубҳа қилмоқда.

• АҚШ
• Арманистон
• Озарбайжон