Намангандаги яширин омборхонадан 1,4 млрд сўмлик ноқонуний дорилар топилди

Наманган шаҳридаги хонадонлардан бирида қиймати қарийб 1,4 миллиард сўм бўлган ноқонуний дори воситалари сақланаётгани аниқланди.

Маълум қилинишича, Давлат хавфсизлик хизмати, Божхона қўмитаси ҳамда Ички ишлар органлари ходимлари ҳамкорлигида ўтказилган тезкор тадбир давомида 2003 йилда туғилган шахснинг яшаш манзили кўздан кечирилди.

Текширув натижасида хонадондаги яширин омборхонадан хорижда ишлаб чиқарилган, тегишли сифат сертификатига эга бўлмаган 28 турдаги 28 928 дона дори воситаси аниқланди. Улар орасида “Ортофен”, “Нейрокс”, “Тирозол”, “Сиофор” ҳамда бошқа препаратлар бор. Барча дори воситалари процессуал тартибда расмийлаштириб олинди.

Дастлабки ҳисоб-китобларга кўра, мамлакатга ноқонуний йўллар билан олиб кирилган ушбу дори воситаларининг умумий қиймати 1,4 миллиард сўмни ташкил этади.

Ҳозирда дори воситалари юзасидан экспертиза тайинланган бўлиб, ҳолат бўйича суриштирув ишлари давом этмоқда.