Эркин кураш спорт тури бўйича 74 кг вазн тоифасида Токио-2020 Олимпиадасида бронза медалини қўлга киритган ўзбекистонлик Бекзод Абдураҳмонов ММА спортига қайтмоқда. Бу ҳақда MMAJunkie нашри хабар бермоқда.

Қайд этиш мумкин, Абдураҳмонов 2012-2017 йиллар оралиғида аралаш жанг санъатлари билан шуғулланган ва мазкур спорт турида еттита жанг ўтказиб, уларнинг барчасида ғалаба қозонган, олтитасида муддатидан аввал ғолибликни қўлга киритган. Унинг ММА бўйича фаолияти Жаҳон чемпионатлари, Осиё ўйинлари ва Осиё чемпионатларида халқаро майдонда медаллар қўлга киритган пайтга тўғри келди.

Абдураҳмоновнинг узоқ танаффусдан кейинги илк жанги жорий йил 17 июнь куни Америка Қўшма Штатларининг Массачусетс штатида ташкил этилаётган Combat FC 4 турнири доирасида бўлиб ўтади. Унга бразилиялик Дерик де Фрейтас (7-5) рақиблик қилади. Жанг ярим ўрта вазн тоифасида (77 кг) ўтказилади. Де Фрейтас фақат минтақавий жангларда иштирок этган ва 16 июнь куни бўлиб ўтадиган баҳс унинг Қўшма Штатлардаги дебюти бўлади.

Эслатиб ўтамиз, Бекзод Абдураҳмонов эркиш кураш бўйича жаҳон чемпионати икки карра бронза медали соҳиби, икки карра Осиё чемпиони ҳамда икки карра Осиё ўйинлари ғолибидир. Ҳамюртимиз айни дамда АҚШдаги Harvard университетида ҳам фаолият юритади.

• Кураш
• MMA