Ғарбий Африка Иқтисодий Ҳамжамияти (ECOWAS) делегацияси Нигер пойтахтига етиб келди. Бу ҳақда “Frans Press” агентлиги минтақавий иттифоқ ва ҳокимиятдан четлатилган президент Муҳаммад Базумга яқин манбаларга таяниб хабар бермоқда.

Аввалроқ ECOWASнинг сиёсий масалалар, тинчлик ва хавфсизлик бўйича комиссари Абдел Фатау Мусаҳ 19 август куни ECOWAS Нигерга дипломатик ваколатхонасини юбориши мумкинлигини айтган эди.

Комиссарнинг сўзларига кўра, жамоа можарони тинч йўл билан ҳал қилишга тайёр, бироқ “танго биргаликда рақсга тушади”. [Комиссар томонидан ишлатилган ушбу ибора қарс икки қўлдан чиқади деган маънони англатади].

“Ғарбий Африка давлатларидан делегация шанба куни Ниамейга яна дипломатик воситачи сифатида ҳаракат қилиш мақсадида етиб келди”, – дейилади агентлик хабарида.

Июл ойи охирида Нигер ҳарбийлари миллий телевидение орқали президент Муҳаммад Базум ҳокимиятдан четлатилганини эълон қилди. Аксарият Ғарб етакчилари ва Ғарбий Африка Иқтисодий Жамияти (ECOWAS) минтақавий ташкилоти давлат тўнтаришини қоралади.

• ECOWAS
• Нигер