АҚШда Доналд Трамп маъмурияти даврида Николас Мадуро билан боғлиқ операция атрофида жиддий можаро юзага келди. Ушбу операцияда қатнашган ҳарбий — Ганнон Кен Ван Дйк махфий маълумотлардан шахсий манфаат учун фойдаланганликда айбланиб ҳибсга олинди.

У прогноз платформаси — Polymarket орқали Венесуэла президентининг қўлга олиниши эҳтимолига олдиндан пул тиккан. Ван Дйк ушбу тикишлар орқали 33 минг долларлик сармояни 400 минг доллардан ортиқ даромадга айлантиргани аниқланган.

Федерал терговчилар фикрича, у ички, ошкор этилмаган ҳукумат маълумотларидан фойдаланиб, ноқонуний фойда кўрган. Кейинчалик эса изларни яшириш мақсадида аккаунтларини ўчириш ва маълумотларни ўзгартиришга уринган.

Унга нисбатан махфий маълумотлардан ноқонуний фойдаланиш, фирибгарлик ҳамда электрон жиноятлар бўйича айбловлар қўйилган. Мазкур иш прогноз бозорларида инсайдерлик билан боғлиқ илк жиноий иш сифатида баҳоланмоқда.

Венесуэла президенти Николас Мадуро 2026 йил бошида Каракасда АҚШ кучлари томонидан қўлга олинган эди. Унга нисбатан наркотерроризм ва бошқа оғир жиноятлар бўйича суд жараёнлари давом этмоқда.

• АҚШ