Бугун, 11 февраль куни Вазирлар Маҳкамасининг “Халқаро таълим дастурлари жорий қилинган техникумлар ходимларининг меҳнатига ҳақ тўлаш тартиби тўғрисидаги низомни тасдиқлаш ҳақида”ги 51-сон қарори билан халқаро таълим дастурлари жорий этилган техникум ходимлари меҳнатига ҳақ тўлашнинг янги тартиби тасдиқланди. Унга кўра:

- 100 фоизлик устама: Халқаро дастурларга жалб қилинган директор, бош бухгалтер, ўқитувчи ва усталарга ҳар ойлик мажбурий устама берилади;

- Рағбатлантириш жамғармаси: Меҳнатга ҳақ тўлаш фондининг 50 фоизи миқдорида махсус жамғарма ташкил этилади;

- Натижага қараб мукофот: Юқори рейтинг балли тўплаган педагоглар базавий ставкасига нисбатан 200 фоизгача қўшимча рағбатлантирилади.

Рағбатлантириш қуйидаги мезонлар асосида амалга оширилади:

- Ўқувчиларнинг ўзлаштириш даражаси ва халқаро танловлардаги ғолиблиги;

- Чет тилини билиш (камида B2 сертификати);

- Халқаро илмий базалардаги (Сcопус, Web of Science) мақолалар;

- Дунёнинг ТОП-1000 талигига кирувчи ОТМ дипломига эгалик.

Лавозим маошлари белгиланиши:

Халқаро дастурлар бўйича бўлим бошлиғи ва мутахассисларнинг иш ҳақи миқдорлари мактаб директори ўринбосари ҳамда тоифали ўқитувчиларнинг базавий ставкаларига тенглаштирилди.

Мазкур харажатлар 2026 йилда вазирликка ажратилган маблағлар, 2027 йилдан бошлаб эса Давлат бюджети ҳисобидан қопланади.

• Маош
• Рағбатлантириш
• Техникум