Самарқанд вилояти ҳокими Эркинжон Турдимов Шанхай ҳамкорлик ташкилоти саммитига мезбонлик муносабати билан мурожаат йўллади. Бу ҳақда вилоят ҳокимлиги ахборот хизмати маълум қилди.

Унда Самарқанд шаҳрида қилинган ишлар ва ўзгаришлар ҳақидаги маълумотлар ҳам қайд этилган.

Таъкидланишича, мазкур саммитга тайёргарлик кеча ёки бугун эмас, Президент Шавкат Мирзиёев томонидан ШҲТнинг 2022 йилдаги саммитини Самарқандда ўтказиш ташаббуси илгари сурилганида бошланган. Бунинг учун Самарқанд шаҳрининг инфратузилмаси тўлиқ янгиланган, йўл ва кўприклар, хиёбонлар қурилиб, Рудакий, Ибн Сино, Бўстонсарой, Афросиёб, Шоҳи Зинда, Садриддин Айний, Регистон, Панжикент, Фирдавсий, Даҳбед каби ўндан ортиқ кўчалар реконструкция қилинди. Уста Умар Жўрақулов кўчаси тубдан қайта қурилди. Бу кўчалар атрофидаги турар жой ва бошқа объектлар ҳам миллий ва замонавий архитектура уйғунлигида янгидан бунёд этилган. Шунингдек, Самарқанд халқаро аэропортининг ўзига хос кўринишдаги замонавий янги терминали ишга туширилган.

“Президентимиз ғояси ва ташаббуси билан 250 гектардан ортиқ очиқ майдонда, эшкак эшиш канали атрофида кейинги йиллар давомида қурилган “Буюк ипак йўли” халқаро туризм маркази халқимиз бунёдкорлик салоҳиятининг ёрқин ифодаси бўлди. Нафақат юртимиз, балки Марказий Осиёда тенги йўқ, деб эътироф этилган бу мажмуада жаҳон стандартларига мос меҳмонхоналар ва конгресс маркази, халқимиз тарихи, маданияти, анъана ва қадриятларини намоён этувчи “Боқий шаҳар” мажмуаси ва яна кўплаб бошқа иншоотлар бугун Самарқанднинг кўркига айланди. Айни пайтда эса буюк муҳаддис бобомиз Имом Бухорий номи билан боғлиқ меъморий мажмуа улуғ зотнинг Ислом оламида тутган мавқеи ва салоҳиятига мос тарзда қайтадан бунёд этилмоқда”, – дейилади баёнотда.

Мурожаатнинг тўлиқ матни билан бу ерда танишиш мумкин.

• Erkinjon Turdimov
• Ҳокимлик
• Самарқанд
• ШҲТ