Кейинги уч йил давомида Ўзбекистонда электротехника ва унга боғлиқ янги саноат йўналишларида умумий қиймати 11,6 миллиард долларлик 164 та лойиҳани амалга ошириш режалаштирилган.

Лойиҳалар тармоқнинг олтита асосий йўналишини қамраб олади. Жумладан, кабель саноатида 2,5 миллиард долларлик 41 та, трансформатор ва насослар ишлаб чиқаришда 1,4 миллиард долларлик 29 та, саноат робототехникаси ва ускунасозликда эса 3 миллиард долларлик 45 та лойиҳа амалга оширилади.

Шунингдек, транспорт ва электромобиллар учун электротехника маҳсулотлари ишлаб чиқаришга 650 миллион долларлик 9 та, электрон компонентлар ва микроэлектроникага 3,5 миллиард долларлик 21 та, маиший техника ишлаб чиқаришга эса 600 миллион долларлик 19 та лойиҳа йўналтирилади.

Белгиланган вазифалар ижросини таъминлаш учун ҳар бир йўналишга масъул раҳбарлар ва асосий буюртмачилар бириктирилади. Уларга таянч инвесторларни жалб қилиш, илмий марказлар ҳамда техника олий таълим муассасалари билан ҳамкорликни йўлга қўйиш топширилган.

Режага кўра, мазкур лойиҳалар орқали электротехника саноатининг янги йўналишларини ривожлантириш ва ишлаб чиқариш кўламини кенгайтириш кўзда тутилган.