Миграция агентлиги бир қатор ташкилотлар билан ҳамкорликда ўзбекистонликларни хорижга ишга таклиф қилмоқда. Хусусан, ҳайдовчилар учун Германия ва Японияда, қурувчилар учун Туркия ва Японияда ишлаш имконияти берилиши мумкин. Шунингдек, Германиядаги ўзбек ресторани ҳам иш ўринлари учун танлов очган.

Миграция агентлиги ва Германиянинг SBH West GmbH ташкилоти автобус ва оғир юк автомобиллари ҳайдовчиларини ишга таклиф қилади.

300 та иш ўрни учун ҳайдовчилар офлайн суҳбат асосида танлаб олинади. Танловда BC, CE ёки D тоифасидаги ҳайдовчилик гувоҳномаси, немис тилидан А2 ёки B1 даражали халқаро тил сертификати бор, судланмаган ва жисмонан соғлом бўлган 21−44 ёшдаги эркак ва аёллар қатнашиши мумкин.

Ойлик маош 2200 еврога тенг, иш жадвали ҳафтасига 5 кун 8 соатдан иборат. Шунингдек, танловдан ўтганлар Германияга кетишдан олдин касбий назарий-амалий тайёргарликдан ўтказилади, уларга визани расмийлаштириб берилади, авиачипта ва аэропортдан иш жойигача трансфер тақдим этилади. Германияда касбий қайта тайёрловдан ўтиш имконияти ҳам бор.

Аниқлик киритилишича, танлаб олинган автобус ҳайдовчилари D тоифаси учун ўқитилади, муваффақиятли ўтган номзодлар Германияга жўнаб кетиш олдидан (виза жараёни бошланганда 1 ой) SBH West ташкилоти кўмагида “Ватанпарвар” марказида касбий қайта тайёрловга қатнашади ва Германия стандартлари асосида касбий немис тили ўқитилади ҳамда автобус симуляторларида амалиёт қилади.

Мурожаат учун Миграция агентлигининг телефон рақами: 71−202−33−55 (қисқа рақам 1282)

Шунингдек, Германиянинг NoVo Agency компанияси Германиянинг Манхейм ҳудудида жойлашган ўзбек ресторанига ишга таклиф қилмоқда. 50 та иш ўрни учун офлайн суҳбат асосида танлов ўтказилади. Танловда касбий ёки олий маълумотга ҳамда ресторанда иш тажрибасига эга, немис тилини камида B даражада биладиган, рус тилида яхши сўзлашувчи, 20−30 ёш оралиғидаги эркак ва аёллар қатнашиши мумкин. Улар тиббий кўрикдан ўтган бўлиши шарт.

Ойлик маош 1500 евро бўлиб, иш вақти ҳафтасига 5 кун 8 соатдан (сменали). Ишчилар бепул овқатланиши мумкин ва уларга бонуслар ҳам берилади.

Ишчиларнинг асосий вазифалари қуйидагилардан иборат:

- мижозларга хизмат кўрсатиш;

- буюртмаларни қабул қилиш ва таом/ичимликларни улашиш;

- столни тайёрлаш;

- кассада ишлаш;

- тозалик ва гигиена қоидаларига риоя қилиш.

Танловдан ўтганлар учун аэропортдан яшаш жойигача трансфер, тиббий суғурта ва транспорт иш берувчи томонидан таъминланади.

Шу билан бирга, визани расмийлаштириш, Германияга учиш ва у ерда яшаш харажатлари (350−400 евро) номзод ҳисобидан амалга оширилади. Аммо меҳнат шартномаси тузилгандан сўнг, Миграция агентлиги виза ва авиачипта харажатларининг маълум қисмини қоплаб беради.

Мурожаат учун Миграция агентлиги телефон рақами: 71−202−33−55 (қисқа рақам 1282)

Бундан ташқари, Япониянинг Proud Partners компанияси Японияда ҳайдовчилик ва қурилиш соҳаларида бўш иш ўринларини таклиф қилади.

Номзодлар Япония компанияси томонидан ташкил қилинадиган 6−8 ойлик бепул ўқув курсларида иштирок этиши талаб этилади.

Етказиб берувчи ҳайдовчиликка 250 та, қурилиш соҳасига 150 та иш ўрни учун танлов офлайн суҳбат асосида 1−2 декабрь кунлари Тошкент шаҳрида ўтказилади.

Ҳайдовчилик учун танловда B-C тоифадаги ҳайдовчилик гувоҳномаси бор, 21−35 ёш оралиғидаги, хавфсизликка эътиборли, интизомли ҳайдовчилар қатнашиши мумкин.

Қурилиш соҳаси учун эса 18−35 ёш оралиғидаги, хавфсизликка эътиборли, интизомли номзодлар талаб этилади.

Ойлик маош 1400 — 1600 долларга тенг бўлиб, йилига бир марта оширилади. Бундан ташқари, бонус ҳам кўзда тутилган бўлиб, иш унумдорлигига қараб йилига 2 марта моддий рағбатлантириш берилади. Иш ҳафтада 5 кун, 8 соатдан.

Турар жой иш берувчи томонидан берилади: ходим ўз ҳисобидан ойига 200 доллар тўлайди, қолганини компания қоплаб беради. Шунингдек, авиачипта харажатлари қопланади, ишчи виза расмийлаштирилади, тиббий ва ижтимоий суғурта билан таъминланади.

Овқатланиш харажатлари номзод ҳисобидан тўланади (ойига тахминан 300 доллар).

Япон ёки инглиз тилини билганларга устунлик берилади. Япон тилини ўрганиш учун Тошкент вилояти Ангрен шаҳрида бепул курслар ташкил этилади, ётоқхона тақдим этилади.

Мурожаат учун Миграция агентлиги телефон рақами: (+998) 71 202−33−55 ички рақам 545

NAIMIX хусусий бандлик агентлиги қурилиш соҳасида ишловчиларни Туркияга ишга таклиф қилмоқда.

450 та иш ўрни учун номзодлар иш берувчи билан юзма-юз суҳбат асосида талаб олинади.

Ойлик маош 700 — 1200 доллар бўлиб, иш вақти ҳафтада 5 кун 8 соатдан. Қўшимча ҳар бир соат учун 3−4 доллардан ҳақ тўланади.

Номзодлар 18−45 ёш оралиғида бўлиши, тажрибага эга бўлиши, жисмонан соғлом, меҳнатсевар ва масъулиятли бўлиши талаб этилади.

Иш берувчи томонидан виза тўлови ва авиачипта харажатлари қопланади, яшаш жойи, 3 маҳал овқат, иш кийими ва транспорт хизмати тақдим этилади.

Мурожаат учун телефон рақами: 71−205−05−00

Манзил: Тошкент шаҳар, Миробод тумани, Истиқбол кўчаси, 36-уй.

• Германия
• Миграция
• Таклиф
• Туркия
• Япония