Бугун, 28 апрел куни Қашқадарё вилоятига оид хабарларни бериб борувчи “Nasafnews” интернет нашри мухбири ИИБ ходимлари томонидан вилоят ҳокимлигига олиб кетилган.

Маълум бўлишича, мухбирлар ишлаётган офисга ИИВ ва терроризмга қарши кураш бошқармасида ишлашини айтган ходимлар бостириб келган ва ходимлардан бири сайт бош муҳарририни мажбурий тартибда олиб кетишга ҳаракат қилган.

Бу ҳақда маълум қилган нашр мухбири ходимларнинг қўлида ҳеч қандай асос ва чақирув хати йўқлигини ёзиб қолдирган.

Маҳаллий блогерлардан бирининг ёзишича, у “Nasafnews” бош муҳаррири билан бир муддат олдин гаплашганида унга ўзини вазир ўринбосари “Саидкарим” эканини айтиб таништирган киши суҳбатга чақирганини, аммо у бу чақирув расмий бўлиши кераклигини ёки унинг ўзи офисга келиши мумкинлигини айтганини билдирган. Бир муддат ўтиб эса юқоридаги ҳолат содир бўлган.

ИИВ Матбуот котиби Шохруҳ Ғиёсов ушбу вазиятга муносабат билдириб, мухбир Д.Набиевнинг сайт офисига ИИО ходимлари бостириб киргани ҳақидаги иддаоларини “ҳақиқатдан йироқ” деб атайди ва мухбир шунчаки, “вилоят ҳокимиятига суҳбатга таклиф этилган”лигини айтади.

Шунингдек, Ғиёсов ижтимоий тармоқ фаолларидан “корпоратив этика”ни қурол қилиб, ёлғон маълумотларни тарқатишдан тийилишларини сўрайди.

Xabardor.uz Ғиёсовнинг вазиятга муносабати бўйича Қашқадарё вилояти ҳокимлиги Матбуот котибидан нашр мухбирининг нега ҳокимликка чақирилгани юзасидан изоҳ олишга уринди. Ҳокимлик матбуот котиби Содиқовнинг айтишича, Д.Набиевни вилоят ҳокимлиги матбуот котиби, қолаверса, вилоятдаги ОАВ вакиллари ҳамда блогерларнинг раҳбари сифатида ўзи чақирган ва бунда ҳеч қандай мажбурлов ҳолатлари бўлмаган.

Бир қараганда ИИВ ҳамда Қашқадарё вилояти ҳокимлигининг Матбуот котиблари берган маълумотлар “бир жойдан чиқди”. Аммо...

“Ҳурматли дўстлар ҳозирча ҳаммаси жойида.

Аммо ИИВ матбуот котиби Шохруҳ Ғиёсовнинг иддаосига тушунмадим, у мени ёлғончиликда айбламоқда.

Хонамга ИИБ ва терроризмга қарши кураш бошқармасиданмиз деб келган ходимларнинг видеосини эълон қиламан.

Ғиёсов доимгидек, Тошкентда ўтириб олиб, маҳаллий журналистларни ғийбатчиликда айблашга уринмоқда. Ва у бу хатти-ҳаракати учун жавоб бериши керак.

Ёлғон ахборот тарқатишга жавобгарлик бор эканини эслатишга уста матбуот котибининг ўзига буни эслатиб қўйиш керак, чоғи”, – деб ёзиб қолдирди Дилшод Набиев ўзининг телеграмдаги каналида.

У, шунингдек, ҳақиқатда ҳокимлик биносида уни ИИВ вазири ўринбосари полковник Саидкарим Нишанбаев кутиб турганини ва у билан суҳбати дўстона ўтганини билдирган.

“Унинг (вазир ўринбосарининг, -таҳр.) фикрлаши менга ёқди. Дўстона суҳбат қилиш учун чақирган экан, аммо унинг ортидагилар буни нотўғри тушуниб, бостириб келишибди.

Саидкарим аканинг бугун менга айтган фикрларини ҳурмат қиламан, ҳақиқатан журналистларга очиқ одам экан”, – деб ёзади нашр мухбири.

Ана энди вазирлик Матбуот котибига қатор саволлар (жумладан, вилоят ҳокимлиги матбуот хизматига ҳам) пайдо бўлади: ИИО ходимларининг таҳририят биносига бостириб қириши ҳолати бўлганини яшириш бу тизим ривожи ёки обрўси учун муҳимми? Умуман, буни бугунги техник имкониятлар ривожланган даврда яшириш мумкинми?

Набиевнинг иддаосига кўра, “бу сайт ходимларига қилинган биринчи босим эмас”. Нега ушбу таҳририят ходимларига нисбатан босимларга кўз юмиляпти?..

• Ғиёсов
• ИИВ
• Матбуот
• Муносабат
• Qashqadaryo