Беларус Тожикистон фуқароларига ойига 750 доллардан 1 200 долларгача маош билан ишлаш имкониятини таклиф қилмоқда. Бу ҳақда Тожикистон Республикаси Меҳнат, мигратсия ва аҳоли бандлиги вазирлиги маълум қилди.

Тожикистон фуқароларини иш билан таъминлаш мақсадида Беларуснинг Гродно вилоятидаги 10 дан ортиқ корхона билан ҳамкорлик шартномалари имзоланган. Иш берувчилар мигрантларни турар жой, қисман овқатланиш ва махсус иш кийимлари билан таъминлашни ваъда қилмоқда. Ишга жойлаштириш хизматлари бепул кўрсатилади.

Бўш иш ўринлари қурилиш, қишлоқ хўжалиги, тўқимачилик, оғир саноат, хизмат кўрсатиш ва транспорт соҳаларини қамраб олади. Номзодлардан рус тилини билиш, судланмаган бўлиш ва соғлиғи яхши бўлиши талаб этилади.

Маълумот учун, июль ойида Беларус Ўзбекистон фуқароларига ҳам иш таклиф қилган эди. Шундан сўнг Андижон вилоятидан 250 дан ортиқ фуқаро қишлоқ хўжалиги ва чорвачилик соҳаларида вақтинчалик ишлаш учун Беларусга борган. Бироқ мигрантлар уларга таклиф қилинган 500 долларлик маошдан норозилик билдирган.

Шундан кейин Беларус раҳбари Александр Лукашенко кўпроқ даромад топмоқчи бўлган ўзбекистонликларга Россияда ишлашни тавсия қилган. Кейинчалик Ўзбекистон Мигратсия агентлиги фуқароларга Беларусда оиласи билан яшаш ва ишлаш имконини берувчи вакансияларни таклиф қилган.

Ҳозирда Тожикистон фуқаролари учун Беларуснинг Гродно вилоятидаги корхоналарда турли соҳалар бўйича ишга жойлашиш имкониятлари таклиф этилмоқда.