Аввал хабар қилинганидек, АОКА ва Жиззах вилояти ҳокимлиги томонидан Республика ва маҳаллий ОАВ вакиллари учун вилоят бўйлаб пресс-тур ташкил этилди. Тур доирасида, Жиззах шаҳридаги «Sambraham» технология университетига ташриф амалга оширилди.

Ҳукуматнинг тегишли қарорига мувофиқ ташкил этилган «Sambraham» университети (Ҳинди222220стон) нодавлат олий таълим ташкилоти ҳисобланиб, у ерда ўқитиш кундузги таълим шаклида, инглиз тилида ҳамда тўлов-контракт асосида амалга оширилади.

Қайд этилишича, университетда 2021-2022 ўқув йилида 2 000 га яқин талаба қабул қилинган бўлиб, таълим муддати 4 йил бўлган (кундузги) 3 та бакалавр йўналиш ва таълим муддати 2 йил бўлган 2 та магистратура мутахассисликлари бўйича ҳужжатлар қабул қилинган. Булар:

Бакалавриат: 1.Ахборот технологиялари муҳандис-дастурчиси (B.Tech.IT)-700 нафар, 2. Ахборот технологиялари фанлари (B.Sci.IT)-500 нафар, 3. Бизнес бошқаруви (ВВА.IT)-700 нафар.

Магистратура: 1. Ахборот технологиялари фанлари (М.Sc.IT)-50 нафар, 2. Бизнес бошқаруви (МВА.IT)-50 нафар.

Маълум қилинишича, университет битирувчиларига Ўзбекистон ва Ҳиндистонда олий таълим тўғрисидаги ҳужжат сифатида тан олинадиган диплом берилади.

Келтирилишича, бугунги кунда университетда 200 ўринли ошхона биноси ҳамда 500 ўринли ётоқхонанинг таъмирланиши бўйича ишлар олиб борилмоқда.

Ҳозирги кунда 1 500 нафардан ортиқ талабалар 2 сменада дарс машғулотларида иштирок этаётган университет фаолиятига Ҳиндистондан 16 нафар, Ўзбекистондан 30 нафар профессор-ўқитувчилар жалб этилган. Умумий илмий салоҳият 30% ни ташкил этади.

Шунингдек, медиа тур иштирокчилари шаҳар марказида жойлашган «Президент мактаби»да ҳам бўлишди.

Давлат раҳбарининг тегишли қарори билан ташкил этилган «Президент мактаби»нинг 144 нафар ўқувчиси вилоят мактабларидаги 260 минг нафарга яқин ўғил-қизлар орасидан энг сараси, билимдони, иқтидорлиси сифатида бу ер ўқишади.

Қисқа фурсат ичида 70,7 млрд.сўм бюджет маблағлари эвазига бунёд этилган мазкур муассасада ўқувчилар учун 120 ўринли ошхонада барча шароитлар яратилган. 50 ўринли мактаб кутубхонасида 9 500 дан зиёд китоб ва қўлланмалардан иборат фонд мавжуд.

Ўз навбатида, мактабдаги ўқув-тарбия жараёнлари халқаро Cambridge Assessment International Education таълим системаси ва маҳаллий таълим тизим интеграциялашган ҳолда ташкил этилган.

Бундан ташқари, ўқувчиларнинг иқтидори, аниқ фанлар ва технологияларга қизиқиши, яратувчанлик салоҳиятини ўстиришга хизмат қиладиган робототехника, моделлаштириш, креатив ижод тўгараклари, физика, кимё, биология каби табиий фанларни чуқурлаштирилган ҳолда ўзлаштириш имконини берадиган лаборатория хоналари ташкил этилган.

Қайд этилишича, мактабда Филлипиндан 3 нафар, Ҳиндистондан 2 нафар, Хорватия, Покистон,Буюк Британия ва Шотландиядан 1 нафардан жами 9 нафар хорижлик малакали ўқитувчи ёшларга таълим беришади.

• Жиззах
• Мактаб
• Медиа-тур