Президент Шавкат Мирзиёев ёқилғи-энергетика соҳаси инвесторлар билан мулоқотда Ўзбекистон халқаро энергетика ҳамкорлигида ўз салоҳиятига таяниб иштирок этаётганини таъкидлади. Мамлакатнинг табиий ресурслари, саноат корхоналари, муҳандислари ва билимли ёшлари сармоя ҳамда илғор технологиялар билан биргаликда юқори қўшилган қиймат яратиш имконини бериши қайд этилди.

Давлат раҳбари таъкидлаганидек, “ЎЗ” ғоясининг иқтисодий мазмуни миллий салоҳиятни ривожлантириш, халқаро ҳамкорликда тенг ҳуқуқли иштирок этиш ва умумий келажак учун масъулиятни ўз зиммасига олишдан иборат.

Энергетика лойиҳаларида мис маҳсулотлари, кабеллар, трансформаторлар, металл конструксиялар ва қурилиш материалларига талаб юқори экани қайд этилди. Бу маҳаллий ишлаб чиқарувчилар учун янги имкониятлар яратиши мумкин.

Президент маҳаллий корхоналар маҳсулот сифати, нархи ва белгиланган стандартларга мувофиқлиги бўйича рақобатлаша олишини таъкидлади. Энергетика лойиҳаларида маҳаллий ишлаб чиқариш имкониятларидан фойдаланиш ва миллий саноат салоҳиятини ривожлантириш масалаларига эътибор қаратилди.