UFC собиқ икки карра чемпиони, 37 ёшли ирландиялик аралаш жанг санъати устаси Конор Макгрегор 18 ойга мусобақалардан четлаштирилди. Бу ҳақда прамоушен матбуот хизмати хабар берди.

Хабарга кўра, Макгрегор 2024 йил давомида уч маротаба ўз жойлашуви ҳақидаги маълумотни тақдим қилмаган. Шу сабабли допинг назоратчилари ундан биологик намуналар ололмаган. Антидопинг қоидаларига кўра, бу ҳолат қоидабузарлик сифатида баҳоланади.

Қоидага кўра, UFC спортчилари ҳар доим ўз аниқ жойлашувлари ҳақида маълумот тақдим этишлари шарт, шунда улар билан ҳар қандай вақтда боғланиш ва олдиндан огоҳлантиришсиз таҳлил олиш имконияти бўлади.

Макгрегорнинг 2024 йил қуйидаги саналарда таҳлил топширмаган:

– 2024 йил 13 июнь;

– 2024 йил 19 сентябрь;

– 2024 йил 20 сентябрь.

Кейинги текширув жараёнларида Макгрегор ташкилот билан тўлиқ ҳамкорлик қилган ва жавобгарликни тан олган. Шунингдек, у ушбу давр мобайнида жароҳатдан тикланаётган ва ҳеч қандай жангга тайёргарлик кўрмаётган эди. Шу сабабли, одатдаги 2 йиллик дисквалификация муддати 18 ойгача қисқартирилган.

Энди, ирландиялик “шоумен” 2026 йил 20 мартдан кейингина октагонга қайта олиши мумкин бўлади.

• Qoidabuzarlik
• UFC