Венесуэла президенти Николас Мадуронинг ўғли — Николас Мадуро Герра АҚШ томонидан отаси қўлга олинганидан сўнг унга омма олдида мурожаат қилди. Бу ҳақда Daily Mail нашри хабар берди.

Сиёсатчи илк бор Каракас шаҳрида, Венесуэла Миллий ассамблеясида бўлиб ўтган йиғилишда отасининг қўлга олиниши юзасидан фикр билдирди. “Дада, сиз оиламиздаги барчани кучли инсонларга айлантирдингиз. Сиз қайтгунингизча биз ўз бурчимизни бажаряпмиз. Ватан ишончли қўлларда, дада. Ва тез орада биз шу ерда — Венесуэлада яна бир-биримизни қучоқлаймиз”, — деди у кўз ёшларини яширмай.

Мадуронинг ўғли, шунингдек, давлат раҳбарларининг ўғирлаб кетилишига кўникиш ҳеч бир давлат хавфсиз эмаслигини англатишини таъкидлади. “Бугун Венесуэла, эртага эса бўйсунишни рад этган исталган мамлакат бўлиши мумкин”, — деди у.

Аввалроқ Хитой Ташқи ишлар вазирлиги расмий вакили Мао Нин АҚШни Николас Мадуро ва унинг рафиқаси Силиа Флореснинг қўлга олиниши орқали халқаро муносабатлар барқарорлигини бузишда айблаган эди. Унинг таъкидлашича, ҳеч бир давлат халқаро ҳуқуқдан устун бўлган ўз қоидаларини ўрнатишга ҳақли эмас. Дипломат Хитой Мадуро ва унинг турмуш ўртоғини зудлик билан озод этишга чақиришини ҳам қайд этган.

• АҚШ
• Сиёсат
• Венесуэла