21 октябрь – ўзбек тили байрами куни муносабати билан Ўзбекистон Бош консулхонаси томонидан Саудия Арабистонининг Макка шаҳридаги маърифий тадбир ўтказилди. Бу ҳақда “Дунё” ахборот агентлиги хабар берди.

“Иштирокчиларга Ўзбекистонда ўзбек тилининг мавқеини мустаҳкамлаш, она тилимизнинг халқаро миқёсдаги нуфузини ошириш бўйича амалга оширилаётган ишлар хусусида батафсил сўзлаб берилди. Бу борада хориждаги кўплаб университетларда ўзбек тили марказлари ташкил этилгани ва чет мамлакатларда ўзбек тилини ўрганишга қизиқувчиларнинг сони йил сайин ортиб бораётгани қайд этилди”, – дейилади хабарда.

Таъкидланганидек, ҳозирги кунда ер юзида ўзбек тилида сўзлашувчилар сони 60 миллиондан ошди, хорижий давлатлардаги 50 дан ортиқ олий ўқув юртида ўзбек тили ўргатилмоқда.

Саудия Арабистонида истиқомат қилаётган асли ўзбек бўлган бухорийлар диаспораси вакиллари миллатимиз аслини акс эттирувчи ўзбек тилини эъзозлаш, жамиятдаги мавқеини юксалтириш ҳамда ёш авлодни она тилига ҳурмат руҳида тарбиялаш долзарб вазифага айланиб бораётганини қайд этишди.

Бўлиб ўтган учрашув якунида Саудия ҳудудида ўзбек тилини кенг тарғиб қилиш, диаспора вакиллари фарзандларининг миллий тилимизни мукаммал эгаллаши учун махсус курслар ташкил этиш ва уларни зарур адабиётлар билан таъминлашга келишиб олинди.

• Ўзбек тили
• Ўзбекистон
• Саудия Арабистони