Ўзбекистон Республикаси президенти Шавкат Мирзиёев 27 январь куни бўлиб ўтган телефон орқали мулоқотда Беларус Республикаси президенти Александр Лукашенкони кеча бўлиб ўтган президент сайловидаги ишончли ғалабаси билан самимий қутлади.

Ўзбекистон раҳбари сайловчиларнинг фаол иштироки ва овоз бериш натижалари Беларус халқи амалдаги президентга юксак ишонч билдираётгани, амалга оширилаётган сиёсат ва ижтимоий-иқтисодий ислоҳотларни кенг қўллаб-қувватлаётганини яна бир бор тасдиқлаганини алоҳида таъкидлаган.

Суҳбат чоғида ўтган йил 7-9 февраль кунлари Беларус президенти Александр Лукашенконинг Ўзбекистонга ташрифи чоғида эришилган келишувларни амалга ошириш нуқтаи назаридан Ўзбекистон-Беларус кўп қиррали шериклик муносабатларини янада ривожлантиришнинг долзарб масалалари кўриб чиқилган.

2024 йилда товар айирбошлаш ҳажми 700 миллион доллардан ошган. Иқтисодиётнинг турли тармоқларида саноат кооперацияси лойиҳаларини жадаллаштириш, яқин ишбилармонлик ва ҳудудлараро алоқаларни, фаол маданий-гуманитар алмашинувларни давом эттириш муҳимлиги таъкидланган.

Суҳбат давомида, Ўзбекистон ва Беларус етакчилари бўлажак тадбирлар режасини ҳам кўриб чиқишган.

• Лукашенко
• Мирзиёев
• Suhbatdosh
• Табрик
• Telefon
• saylov