Бугун, 27 май куни Евроосиё иқтисодий иттифоқи давлат раҳбарлари, ЕОИИда кузатувчи давлатлар – Куба ва Ўзбекистон президентлари ҳамда Евроосиё иқтисодий комиссияси ҳайъати раиси Михаил Мясникович иштирокида Олий Евроосиё иқтисодий кенгашининг видеоконференция шаклида йиғилиши бўлиб ўтди.

Мазкур тадбирда кузатувчи давлат вакили сифатида иштирок этган Ўзбекистон Президенти Шавкат Мирзиёевга ҳам сўз берилди.

Мирзиёев мазкур ташкилот билан Ўзбекистон кузатувчи сифатида ҳамкорлик алоқаларини давом эттираётганини, мамлакт ЕОИИ билан ҳамкорликни ривожлантириш тарафдори эканини таъкидлади.

Шунингдек, Ўзбекистон раҳбари қатор таклифларни ҳам илгари сурди. Жумладан, ЕОИИ доирасида қишлоқ хўжалиги соҳасида ҳамкорлик дастурини ишлаб чиқиш, ташкилотга аъзо ва кузатувчи давлатларда ишчи кучини жалб қилиш соҳасидаги тартибларни соддалаштириш ҳамда аъзо ва кузатувчи давлатларда йўловчи ташишни тўлиқ тиклаш масаласини ишлаб чиқишни таклиф қилди.

Мирзиёев, шунингдек, ЕОИИга кузда Ўзбекистонда туризм соҳасини ривожлантириш бўйича форум ўтказишни таклиф қилди.

Ўзбекистон Президенти ўз нутқида истиқболдаги иқтисодий режалар ҳақида ҳам тўхталиб, логистика масаласига ҳам тўхталди.  

– Ўзбекистон яқин келажакда Қирғизистон ва Хитой билан темир йўл қуриш лойиҳасини ишга туширишни режалаштирмоқда.

Ўзбекистон Жанубий Осиё бозорига энг қисқа муддатда чиқиш учун Трансафғон темир йўли қурилишида ЕОИИ билан ҳамкорлик қилишга тайёр, – деди Мирзиёев.

Шунингдек, давлат раҳбари озиқ-овқат ва хом ашё экспортига қўйилган тақиқларнинг Ўзбекистонга таъсири бўлмаслигига ишонишини таъкидлади.

• Мирзиёев
• Президент
• ЕОИИ