Руминиянинг Слатина шаҳридаги Стреҳеретс қабристонида CОВИД-19 пандемияси даврига оид инсон қолдиқлари ва чиримаган жасадлар солинган қоплар топилди. Бу ҳақда Слатина шаҳар ҳокими Марио Де Метссо маълум қилди.

Ҳокимнинг сўзларига кўра, қабристонда таъмирлаш ва қабр қазиш ишлари олиб борилаётган пайтда ишчилар инсон суякларини аниқлаган ва бу ҳақда политсияга хабар берган. Кейинчалик ҳуқуқни муҳофаза қилувчи органлар ҳудудда қазиш ишларини давом эттирган.

Де Метссо қазиш ишлари давомида юзлаб инсон суяклари ҳамда CОВИД-19 пандемияси даврида фойдаланилган махсус қопларга солинган жасадлар аниқланганини билдирган. Қопларда дафн саналари ҳам кўрсатилгани айтилмоқда.

Шаҳар ҳокимининг таъкидлашича, қабристонлардан фойдаланиш қоидаларига кўра, ташлаб қўйилган қабрлардан инсон суяклари топилган тақдирда, улар айнан ўша жойда махсус тайёрланган бўшлиқларга қайта дафн этилиши керак.

Маълумотларга кўра, инсон қолдиқлари солинган қопларнинг бир қисми 16-сентабр куни аниқланган. Суд манбаларига кўра, шу куни бир қабр остидан олти қоп суяк олиб чиқилган, 18-сентабр куни эса яна 13 қоп суяк топилган.

Де Метссо қабристоннинг собиқ хусусий маъмуриятини инсон қолдиқларини тегишли тартибда дафн этмаганликда айблаган. Унинг айтишича, бир неча йил аввал қабристоннинг собиқ маъмури дафн қилиниши керак бўлган жасад солинган тобутни қабрга сиғдириш учун арралаган.

Ҳокимнинг маълум қилишича, шаҳар маъмурияти бир неча суд жараёнидан сўнг қабристонни хусусий оператордан қайтариб олган.

Де Метссо терговнинг боришидан норозилигини билдириб, прокуратура ва Олт округи политсиясидан қабристон ҳудудидаги бошқа криптани ҳам текширишни сўраган. Унинг айтишича, ушбу крипта ҳам яқинда қурилган бўлиб, биринчи крипта остидан инсон қолдиқлари топилгач, иккинчи ҳудудда ҳам қазиш ишларини олиб бориш зарур.

Ҳокимнинг таъкидлашича, воқеа юзасидан бир ҳафта ўтганига қарамай, ҳеч ким, жумладан, қабристонни бошқарган компания маъмурияти вакиллари ҳам сўроқ қилинмаган.

Стреҳеретс Слатинадаги энг йирик қабристонлардан бири ҳисобланади. У 16 йил аввал шаҳар маъмурияти томонидан хусусий компанияга бошқарув учун берилган. Сўнгги йилларда қабристонни бошқариш ва ундаги хизматлар учун ундириладиган тўловлар юзасидан аҳоли шикоятлари кўпайган.

Шу сабабли шаҳар маъмурияти икки йил аввал хусусий компания билан шартномани бекор қилиб, қабристонни ўз тасарруфига қайтариш жараёнини бошлаган.