Ўзбекистонда иш жойидаги тазйиқ ва зўравонлик ҳолатлари юзасидан онлайн мурожаат қилиш имконини берувчи портал ишга туширилади. Бу ҳақда Президент Шавкат Мирзиёевнинг 21-сентабрдаги «Меҳнат соҳасида хавфсиз ва ҳурматга асосланган иш муҳитини таъминлаш чора-тадбирлари тўғрисида»ги қарорида белгиланган.

Қарорга кўра, Меҳнат соҳасида хавфсиз ва ҳурматга асосланган иш муҳитини таъминлаш дастури давлат органлари ва ташкилотлари, устав капиталида давлат улуши 50 фоиз ва ундан ортиқ бўлган юридик шахслар ҳамда бошқа корхона ва ташкилотларда босқичма-босқич жорий этилади.

2026-йил 1-декабргача «Хавфсиз ва ҳурматга асосланган иш муҳити» ахборот порталини ишга тушириш белгиланган.

Портал орқали:

тазйиқ ва зўравонлик ҳолатлари бўйича онлайн мурожаатлар қабул қилинади;

мансабдор шахслар ёки масъул ходимлар томонидан содир этилган ҳолатлар ҳақидаги мурожаатлар юқори турувчи ташкилотларга автоматик юборилади;

мурожаатларни текшириш, далилларни тўплаш ва хулосалар тайёрлаш жараёнлари амалга оширилади;

текширувлар ва уларнинг натижалари, кўрилган чоралар ҳақидаги маълумотлар сақланади;

маъмурий ҳуқуқбузарлик ёки жиноят аломатлари аниқланган ҳолатларда мурожаатлар «112» ягона диспетчерлик хизмати орқали ваколатли органларга юборилади.

Бундан ташқари, Бошқарув самарадорлиги агентлигига портал орқали аниқланган қоидабузарликларни бартараф этиш юзасидан давлат органлари ва ташкилотларига бажарилиши мажбурий бўлган тақдимномалар киритиш ваколати берилади.

Қарорда иш жойидаги зўравонлик ва тазйиқ ҳолатларига нисбатан меҳнат интизоми доирасида тегишли чоралар кўриш ҳам назарда тутилган.

Жумладан, жинсий ёки жисмоний зўравонлик ҳамда шаҳвоний шилқимлик меҳнат мажбуриятларини бир марта қўпол бузиш сифатида баҳоланиши мумкин.

Ходимга нисбатан тазйиқ, руҳий босим, камситиш ёки мурожаати сабабли таъқиб қилиш ҳолатларини эса меҳнат интизомини бузиш сифатида баҳолаш белгиланган.