Ижтимоий тармоқларда ўқувчиларнинг эшакда мактабга қатнаётгани акс этган видео тарқалиб, муҳокамаларга сабаб бўлди. Ҳолат юзасидан Самарқанд вилояти Мактабгача ва мактаб таълими бошқармаси изоҳ берди.

Маълум қилинишича, видеодаги ҳолат Каттақўрғон тумани марказидан 40 километр узоқда жойлашган «Бургансой» маҳалласидаги Олмосувон қишлоғидаги 84-сонли умумий ўрта таълим мактабида содир бўлган.

Мазкур ҳудуд Қўшработ тумани билан чегарадош бўлиб, тоғ ёнбағирларида жойлашган кичик ва тарқоқ қишлоқлардан иборат. Ички йўллар асосан сўқмоқлардан ташкил топган.

Айни пайтда мактабда 92 нафар, унинг филиалида эса 21 нафар ўқувчи таҳсил олмоқда. Филиал билан асосий мактаб биноси ўртасидаги масофа 3 километрни ташкил этади. Асосий бинога қатнайдиган ўқувчиларнинг энг узоқ йўли 4 километр.

5–11-синфларда жами 74 нафар ўқувчи ўқийди. Уларнинг 45 нафари Олмосувон, 13 нафари Қўшамазор, 17 нафари Тўлали ва 17 нафари Жилқиҳайдар қишлоқларидан қатнайди.

Бошқарма изоҳида тоғли ҳудуд ва аҳоли пунктларининг тарқоқ жойлашгани сабабли маҳаллий аҳолининг аксарият қисми, жумладан, кундалик ҳаракатланишда эшак каби уловлардан фойдаланиши қайд этилган.

Айни вақтда мутасадди ташкилотлар томонидан олис ва тоғли ҳудудларда ўқувчиларнинг мактабга хавфсиз ва қулай қатнаши, шунингдек, йўл инфратузилмасини яхшилаш бўйича чора-тадбирлар дастури кўриб чиқилмоқда.

Маълумот учун, «Ўзбекистон — 2030» стратегиясида олис ҳудудларда жойлашган 715 та мактаб ўқувчилари учун бепул мактаб автобусларини йўлга қўйиш белгиланган.

2025 йил июнида Самарқанд вилоятининг Қўшработ туманидаги 20 та олис мактаб ўқувчилари учун 17 та янги мактаб автобуси тақдим этилганди.