Наманган вилояти Поп туманида ҳуқуқни муҳофаза қилувчи орган ходимлари томонидан ер майдонини фуқароларга хусусий мулк сифатида ноқонуний расмийлаштириб бериш ҳолати юзасидан тезкор тадбир ўтказилди.

Поп тумани ҳоким ёрдамчиси 1988 йилда туғилган фуқарога 49 йил муддатга деҳқон хўжалиги билан шуғулланиш учун ажратиб берилган 30 сотих ер майдонини ўзининг мансабдор танишлари орқали хусусий мулк сифатида расмийлаштириб, унинг 6 сотих қисмида қурилган уй-жой учун тегишли кадастр ҳужжатларини тайёрлатиб бериш эвазига 2 минг АҚШ доллари талаб қилади.

ДХХ ва Иқтисодий жиноятларга қарши курашиш департаменти ходимлари томонидан ўтказилган тезкор тадбирда ҳоким ёрдамчиси олдиндан 1000 АҚШ долларини ўзининг 1990 йилда туғилган таниши орқали олган вақтида ушланди.

Ҳозирда ушбу шахсларга нисбатан ЖКнинг 168-моддаси 2-қисми “б” банди ва 28-, 211-моддаси 1-қисми билан жиноят иши қўзғатилиб, тергов ҳаракатлари олиб борилмоқда.

Шунингдек, Давлат кадастрлари палатасининг Поп туман филиали ишчиси давлат захирасидаги 10 сотих ер майдони ва унда қурилган уй-жойни ўзининг мансабдор танишлари орқали шахсий мулк сифатида фуқаро номига расмийлаштириб бериш эвазига 900 АҚШ доллари ва 4,8 млн сўм олган вақтида ДХХ, ИИВ ва ИЖҚКД ходимлари томонидан ушланди.

Ҳозирда кадастр ишчисига нисбатан ЖКнинг 168-моддаси 3-қисми билан жиноят иши қўзғатилиб, тергов ҳаракатлари олиб борилмоқда.

• ДХХ
• Жиноят
• Наманган
• Пора